भरदुपार
माळावर तापल्या दुपारी
लपलपते मातीवर मृगजळ
खुट्ट वाळल्या बाभुळशेंगा
कुजबुजती वाऱ्याची खळखळ
जीर्ण ढगाला कवेत घेऊन
ऊनकाहिली करी नागडा
ओल्या नजरेने भिरभिरतो
शुष्क सालीचा पिवळा सरडा
मांडुन पत्रावळ पानांची
पळससावल्या दिशा चाटती
डिंक चिकटल्या भेगांमधला
हळू ओघळे मुंग्यांभवती
उरलासुरला चिगूर करपुन
थरथरतो चिंचेवर सुकल्या
सुन्न कापऱ्या क्षितीजावरती
घारींच्या राहिल्या सावल्या
माळावर तापल्या दुपारी
काट्यांमध्ये मारुन फतकल
रवंथ करते बाभुळपाला
बकरी सुस्तावली अजागळ
प्रतिक्रिया
चिगूर
मातीचा गंध असलेली कविता. फार आवडली. चिगूर म्हणजे मोहोर का?
धन्यवाद शान्तादुर्गा!
चिगूर म्हणजे चिंचेचा कोवळा पाला.
माहीत नव्हते. नवा शब्द कळला.
माहीत नव्हते. नवा शब्द कळला.
भर दुपारची काहिली
डोळ्यांपुढे भगभगून गेली!
मलाही कविता आवडली.
मलाही कविता आवडली.
धन्यवाद anant_yaatree, ..शुचि
धन्यवाद anant_yaatree, ..शुचि