आई, अशी कशी ही दिवाळी !
आई, अशी कशी ही दिवाळी
येते पटकन, सरते झटकन,
अभ्यासाला पुन्हा जुंपते
दहा दिवस का जाती चटकन !
फराळाच्या डब्यात मोठ्ठ्या
गोड गोड का तसेच उरते ?
चकली चिवडा चट्टामट्टा
पोटामध्ये भरकन जिरते !
भुईचक्र अन् टिकल्या आता
कंटाळा मज येइ उडवता -
धमाल दिसते मोठया हाती
बॉम्ब नि रॉकेट आवाज करता !
सुट्टी असते किती ग हट्टी
ठरल्या दिवशी येते जाते -
मित्रमंडळी गोळा होता
धमाल अमुची मनीं रहाते !
दिवाळी संपुन सुट्टी संपता
जुनाट दिसती नवीन कपडे...
आई, सांग ना दिवाळीस ग
बारा महिने थांब, तू इकडे !
.
प्रतिक्रिया
मस्त! शेवटच्या कडव्यात जरा
मस्त!
शेवटच्या कडव्यात जरा अडखळलो (एखाद-दोन मात्रा जास्त वाटल्या - मोजल्या नाहीयेत फक्त अंदाज)
- ऋ
-------
लव्ह अॅड लेट लव्ह!
सहमत -
ऋषिकेश,
पूर्णपणे सहमत आहे. बालगीत असल्याने जास्त खोलात गेलो नाही इतकच .
धन्यवाद.
क्षमस्व पण बालगीतातच ठेका
क्षमस्व पण बालगीतातच ठेका अचुक हवा...त्याबाबत जास्त काळजी घ्यायला हवी असे वाटते.
- ऋ
-------
लव्ह अॅड लेट लव्ह!
ठेका आणि ठसका -
ठेक्यात आणि ठसक्यात म्हणायला, मला तरी मात्रा चुकल्यामुळे काही अडचण आली नाही. परखड मतामुळे आनंद वाटला आणि वाढला, ऋषिकेश !
कविता आवडली.
कविता आवडली.