जब्याऽऽ, एऽ फँऽऽन्ड्री, पकड साला
ही आहे एक खोल विहीर, अठराविसे पायर्यांची,
आणि धूर्तांनी रचलेल्या मूर्ख दगडांच्या उतरंडीची,
विहीर इतकी अंधारी, खोल की तळ दिसत नाही,
तो ही सारा खडकाळ, पाण्याचा एक टिपूस नाही,
खडकाळ, रिकामी असली विहीर तरी नाही रिती,
सुकल्या तळावर उभी आहे चार जीवांची झोपडी,
दगड खडकांशी झुंजणारे ते आकांताने वर येतात,
काठावरचे 'बघे' त्यांना पुन्हा खाली लोटून देतात
थोडी चढण चढून येताच काठावरून होते गर्जना
जब्याऽऽ, एऽ फँऽऽन्ड्री, पकड साला पकड. हाऽ हाऽ हाऽ
पाणी नसल्या विहिरीच्या काठावर झुंबड हीऽ मोठी
माणसांची, पोरांची, पोरींची आणि गावच्या पुंडांची
'भाईयो और बहनो स्पेशल शो, विहिरीतला तमाशा,
साथमें खाओ, या फिर पिओ मस्त थंडा पेप्सीकोला'
पेप्सीकोला घेई हाती नि चिमणी बघते दुरून,
'काम' सोडून पुंड बसला निवांत टमरेल झाकून
थोडी चढण चढून येताच काठावरून होते गर्जना
जब्याऽऽ, एऽ फँऽऽन्ड्री, पकड साला पकड. हाऽ हाऽ हाऽ
शाळेची घंटा झाली. आता जन गण मन' म्हणा
सारे प्रार्थनेला उभे रहा, राष्ट्रगीताला मान द्या
एऽ जब्या, हलू नकोस, हात हवेतला वळवू नकोस,
रग लागल्या पायावरचा भार मुळी सोडू नकोस
आपल्या महान देशाबद्दल थोडा आदर असू दे
'भारतमाता की...' लाही 'जऽय'चा प्रतिसाद दे
थोडी चढण चढून येताच काठावरून होते गर्जना
जब्याऽऽ, एऽ फँऽऽन्ड्री, पकड साला पकड. हाऽ हाऽ हाऽ
अरे, बेहत्तर आहे दगडावरची पकड सुटली तरी,
अरे, बेहत्तर आहे पुन्हा तळाशी कोसळलास तरी
नेहेमीप्रमाणेच एक-दोन हाडेच काय ती पिचतील,
कदाचित बापासारखे तुझे गुडघेसुद्धा फुटतील,
सावळ्या देहावरती कुठे रक्ताचे ओघळ वाहतील
पाहशील तू, काठावरचे त्यांना सुद्धा दाद देतील
थोडी चढण चढून येताच काठावरून होते गर्जना
जब्याऽऽ, एऽ फँऽऽन्ड्री, पकड साला पकड. हाऽ हाऽ हाऽ
हा तर पोचला काठापर्यंत, फारच आहे माजला
हाणा सारे नेम धरून, होउ द्या वर्षाव दगडांचा
साला इतक्या लवकर शो संपवतो म्हणजे काय,
इथे आम्हाला तर अजून 'प्रेशर' पण आला नाय
साल्या, इथून कटायचं. इथे काठावर नाही यायचं,
ज्यानं त्यानं आपापल्या पायरीनंच असतं र्हायचं
थोडी चढण चढून येताच काठावरून होते गर्जना
जब्याऽऽ, एऽ फँऽऽन्ड्री, पकड साला पकड. हाऽ हाऽ हाऽ
काठावरची ती अबोल चिमणी काठावरच राहील,
पेप्सीकोला संपला की आपल्या घरी निघून जाईल
येड्या, विहिरीतल्या जीवांसाठी नसते कधी चिमणी,
शिटणार्या पारव्यांशीच विहिरीची असावी सलगी
तळाच्या पारव्याने नसते अशी झेप कधी घ्यायची
उंच झाडावरच्या चिमणीची नसते आस धरायची
थोडी चढण चढून येताच काठावरून होते गर्जना
जब्याऽऽ, एऽ फँऽऽन्ड्री, पकड साला पकड. हाऽ हाऽ हाऽ
कडक कपड्यातले काही लोकही विहीरीवरती आले,
पॉपकॉर्नच्या पुडीसोबत थोडे त्यांनीही येन्जॉय केले,
थोड्या वेळात वैतागले, म्हणे वेळ साला फुकट गेला
याच्या पेक्षा ढिशुम ढिशुम पिक्चर असता पायला
शालू बी साली चिकणी नाय, एक लवसीन बी नाय
चंक्याची असली खडकाळ विहीर पायची काय?
थोडी चढण चढून येताच काठावरून होते गर्जना
जब्याऽऽ, एऽ फँऽऽन्ड्री, पकड साला पकड. हाऽ हाऽ हाऽ
चंक्या लेका फुकट रे फुकट केलास सारा खटाटोप,
विहीरीच्या तळातले विहिरीतच राहणार लोक
दिगंताची सारी खडकाळ, वांझ जमीन पाहिलीस,
काठावरच्या माणसांची पण नियत नाही जाणलीस
या असल्या खडकात कुठे रुजते अबोलीचे बीज?
साध्या हिरव्या अंकुराचीही इथे नसते कुठे वीण
इथे हवा गुलाबांचा ताटवा, वॅलंटाईन 'डे'चा फुलोरा,
सलमानच्या फाईट्सवर 'चिकनी चमेली'चा उतारा
थोडी चढण चढून येताच काठावरून होते गर्जना
जब्याऽऽ, एऽ फँऽऽन्ड्री, पकड साला पकड. हाऽ हाऽ हाऽ
प्रतिक्रिया
:-(
आता सिनेमा पहायलाच लागणार.
आता सिनेमा पहायलाच लागणार.
चित्रपट पाहिला नाही.. पण
चित्रपट पाहिला नाही.. पण कविता अशी की ती समजून धेताना जे लहानपणापासून पाहात, वाचत आलो आहे त्याशिवाय इतर संदर्भाची गरजच भासू नये.
हम्म्म!
हम्म्म!
बिपिन कार्यकर्ते
ररा, तुमच्या कवितेने पुन्हा
ररा, तुमच्या कवितेने पुन्हा नागराज मंजुळेंची मुलाखत आठवली मुक्तांगणचा संघर्ष सन्मान पुरस्कार यावर्षी त्यांना मिळाला आहे. त्यांच्याविषयी माहिती सांगताना ते पारधी समाजाचे आहेत असा उल्लेख झाला. ती चुक लक्षात आणुन देत त्यांनी सांगितले की ते वडार समाजाचे आहेत. पुढे अतिशय मार्मिकपणे म्हणाले कि हि चुक अशीच व्हावी. अशीच होत जावी. जातींचा उल्लेख चुकत रहावा. शेवटी सारे एकमेकात मिसळुन जावे आणि जात राहुच नये.
फार वेगळ्या तर्हेची मुलाखत होती ती. इतकं प्रांजळपणे बोलणारा माणुस क्वचितच पाहिलाय.
कडक कपड्यातले काही लोकही विहीरीवरती आले,
पॉपकॉर्नच्या पुडीसोबत थोडे त्यांनीही येन्जॉय केले,
थोड्या वेळात वैतागले, म्हणे वेळ साला फुकट गेला
याच्या पेक्षा ढिशुम ढिशुम पिक्चर असता पायला
शालू बी साली चिकणी नाय, एक लवसीन बी नाय
चंक्याची असली खडकाळ विहीर पायची काय?
या ओळींसाठी आपल्याला दंडवत
संवाद
राजहंसाचे चालणे | भूतळी जालिया शाहाणें | आणिकें काय कोणें | चालावेचिना?
ररा! असे लिहिता म्हणून
ररा! असे लिहिता म्हणून कधीतरीच लिहिण्याबद्दलही काही वाटत नाही.
एकदा लिहिता नी वाचणार्याला कित्येक दिवसांचं खाद्य देता..
चित्रपट बघितलाच पाहिजे आता.
- ऋ
-------
लव्ह अॅड लेट लव्ह!
आजच सिनेमा बघून आलो आणि
आजच सिनेमा बघून आलो आणि पुन्हा ही कविता वाचली. सगळे संदर्भ लागले. नागराज मंजुळेंना ही कविता जरूर पाठवा. सिनेमा पाहून ते वास्तव शब्दांत मांडावंसं वाटणं आणि इतक्या समर्थपणे ते मांडणं ही उत्कृष्ट दाद आहे.
बाकी ते कडक कपड्यातले विहिरीवर आलेले लोक दुर्दैवाने मलाही भेटले. मोडलेलं स्वप्न वाहनावर लादून घेऊन हताशपणे जड पावलं टाकत परत येण्याच्या सीनमधूनही त्यांना काहीतरी कॉमेडी दिसायला हवं होतं, त्यांनी शोधलं आणि त्यांना सापडलंही. कारण खदाखदा हसण्याचे आवाज येत होते.
धन्यवाद राजेश
मोडलेलं स्वप्न वाहनावर लादून घेऊन हताशपणे जड पावलं टाकत परत येण्याच्या सीनमधूनही त्यांना काहीतरी कॉमेडी दिसायला हवं होतं, त्यांनी शोधलं आणि त्यांना सापडलंही. >> अडचण हीच आहे. चित्रपटात काय दाखवावे हे आम्हीच सांगणार, कुठल्या विषयावर चित्रपट काढूच नयेत इतक्या टोकालादेखील जाणार आम्ही, मग आम्हाला जे पसंत नाही ते प्रकाशित/प्रसारित होताच कामा नये हा उद्दामपणाही आम्ही मिरवणार. दुसरीकडे प्रत्यक्ष चित्रपटात, कथेत प्रत्यक्षात काय आहे यापेक्षा 'काय आहे असे मला वाटते' यावरच आम्ही आहे असे समजून तसे एन्जॉय करणार, इतरांनी ते तसेच पहावे हा आग्रहही धरणार. एकुणात काय तर समोरच्याला काय म्हणायचे/सांगायचे आहे हे महत्त्वाचे नाही, आम्ही ते ऐकणार नाही आणि आसपासच्या इतरांना ऐकू देणार नाही. आम्हालाच काय ते सारे बरोब्बर समजले आहे नि तेच सार्यांनी ऐकले पाहिजे हा उद्दामपणाही जोडीला असणार.
आणि हे दुराग्रह सामान्य प्रेक्षकांपुरते मर्यादित आहेत असंही नाही.
I think therefore you are wrong!
-Ramata De-scare-de
आणि हे दुराग्रह सामान्य
अगदी नेमके. मेरे तरफ से एक मार्मिक.
माहिष्मती साम्राज्यं अस्माकं अजेयं
याला खवचट का म्हणे?
याला खवचट का म्हणे?
मलाही हाच प्रश्न पडला आहे.
मलाही हाच प्रश्न पडला आहे.
माहिष्मती साम्राज्यं अस्माकं अजेयं
मी क्षेणी बद्दल्ली
मी क्षेणी बद्दल्ली
धन्यवाद
धन्यवाद
माहिष्मती साम्राज्यं अस्माकं अजेयं
अहो खवचट भौ/तै कारण तर कळु
अहो खवचट भौ/तै कारण तर कळु द्या खवचट क्षेणी मागचं ?
हेच
हेच म्हणतो.
खवचटश्रेणीदात्याने कॄपया कारण विशद केल्यास आभारी राहू.
माहिष्मती साम्राज्यं अस्माकं अजेयं
दुसरीकडे प्रत्यक्ष चित्रपटात,
एका पातळीवर शेवटी काय आहे असं मला वाटतं, हेच असतं. कारण प्रत्यक्ष सत्य किंवा अॅब्सोल्यूट सत्य हे विज्ञानात असलं तरी कलानुभवात मला काय वाटलं हेच महत्त्वाचं ठरतं. तेव्हा एका मर्यादेपर्यंत प्रतीतात फरक असतो, आणि असावाही - त्याशिवाय कलानुभव भरीव होणार नाही. मात्र आपली अनुभूती इतरांवर लादणं योग्य नाही.
प्रेक्षकांची ही वागणूक काहीशी बेशिस्त ड्रायव्हिंगसारखी वाटते. रस्ते आहेत म्हणजे सर्वजण एकाच ठिकाणी पोचतात असं नाही. पण त्या त्या मार्गावर सर्वसाधारणपणे सर्वजण लेनमध्ये राहिले तर ड्रायव्हिंग सगळ्यांसाठीच सुखकर होतं. मला वाटतं ही शिस्त यायला ड्रायव्हर्सच्या काही पिढ्या जाव्या लागतील.
सामान्य प्रेक्षकांपलिकडे कुठच्याही 'सेनां'चे लोक अर्थातच अशी मुस्कटदाबी करून आपलं म्हणणं लोकांवर लादतातच.
>>एका पातळीवर शेवटी काय आहे
>>एका पातळीवर शेवटी काय आहे असं मला वाटतं, हेच असतं.
अन्यथा सांगणार्याने उचकटून सांगायला पाहिजे.
--------------------------------------------
ऐसीवरील गमभन इतरांपेक्षा वेगळे आहे.
प्रमाणित करण्यात येते की हा आयडी एमसीपी आहे.
वा वा वा
ररांच्या या प्रतिसादाशी निगडीत
.
ऐला ! मला वाटलं आकुर्डीत
--------------------------------------------
ऐसीवरील गमभन इतरांपेक्षा वेगळे आहे.
प्रमाणित करण्यात येते की हा आयडी एमसीपी आहे.
या पीजेसाठी माझ्या तर्फे एक
या पीजेसाठी माझ्या तर्फे एक निरर्थक बहाल केली खरी पण विनोदीची मेजॉरीटी दिस्तेय
- ऋ
-------
लव्ह अॅड लेट लव्ह!
हो
निगडित आणि निगडीतमध्ये फरक आहे त्यामुळे विनोद अस्थानी वाटला नाही.
हा हा हा
हा हा हा
शेवटचा
गब्बर लिंकांचा किंवा jargonsचा भडिमार न करता शेवटचा प्रतिसाद्/युक्तीवाद कधी केला होतास ?
--मनोबा
.
संगति जयाच्या खेळलो मी सदाहि | हाकेस तो आता ओ देत नाही
.
memories....often the marks people leave are scars
पण इथे युक्तिवाद कुठे केलाय
पण इथे युक्तिवाद कुठे केलाय मी ?
---
तुम्हाला सगळं स्पून फीडींग पायजे. व्हिडिओ लिंका दिल्या (व त्या अतिसुलभ असल्यातरी) तुम्ही बघत नाही.
सापेक्ष अपेक्षा
हलक्याने घ्यायचा प्रतिसाद : रोख तथाकथित विचारजंती समीक्षकांकडे आहे की काय?
गंभीर प्रतिसाद : पण एकाच कलाकृतीकडे वेगवेगळ्या अंगांनी पाहता येतं आणि आस्वादात रुचिर्भिन्नता अंतर्भूत असते त्यामुळे कोणाला काय आवडतं ह्यात सापेक्षता असते हे लक्षात घेऊन मग आपण ह्या बाबतीत काय करू शकतो? संगीत-नाटक-सिनेमासारख्या सामूहिक आस्वादाच्या कलांच्या बाबतीत इतरांच्या आस्वादात आडकाठी उत्पन्न होईल असं वर्तन करू नये एवढी तरी अपेक्षा निदान बाळगता यावी.
- चिंतातुर जंतू
"ही जीवांची इतकी गरदी जगात आहे का रास्त |
भरती मूर्खांचीच होत ना?" "एक तूच होसी ज्यास्त" ||
रोख
रोख तथाकथित विचारजंती समीक्षकांकडे आहे की काय?>> रोख तसा कुठेही नाही. (समीक्षकांना इतके महत्त्व काय द्यायचे?) 'इफ द कॅप फिट्स' प्रकारचे विधान आहे ते. रच्याकने 'विचारजंती समीक्षक' ही द्विरुक्ती होते आहे.
I think therefore you are wrong!
-Ramata De-scare-de
'विचारजंती समीक्षक' ही
'विचारजंती समीक्षक' ही द्विरुक्ती होते आहे.
मतभेद नोंदवून थांबते.
-मेघना भुस्कुटे
***********
तुन्द हैं शोले, सुर्ख है आहन
हल्ली
स्मायल्या वाचण्याची पद्धत अस्तंगत होऊ पाहते आहे हे नोंदवून थांबतो.
I think therefore you are wrong!
-Ramata De-scare-de
बरं बरं! ह.घ्यायचं होतं काय?
बरं बरं! ह.घ्यायचं होतं काय?
-मेघना भुस्कुटे
***********
तुन्द हैं शोले, सुर्ख है आहन
आता
आता सिनेमा बघावाच लागणार!
काल रात्रीच सिनेमा
काल रात्रीच सिनेमा बघितला.
आवडला असं नाही म्हणनार. आवडण्यासारखं आहे तरी काय सिनेमात ?
शेवटच्या सिनमघे फुले,आंबेडकर,सावित्री,गाडगे बाबा यांचे फोटोत फँन्ड्री आणि जब्या ला बघणारे 'डोळे' बरचं काही बोलुन गेले.
आपल्या लेखनीला __/\__
फँड्री:इतके कौतुक कशाला?
फँड्री:इतके कौतुक कशाला? उत्तर- ज्या लोकांना तो आवडला तो ते व्यक्त करण्यासाठी. जी गोष्ट आवडली त्या गोष्टीचे कौतुक करणे हा मानवी अभिव्यक्तीचा भाग आहे. आता का आवडला याचे समोरच्याला पटेल असे उत्तर मिळू शकत नाही. एखाद्याला बोंबील आवडते तर एखाद्याला नाही आवडत.मी फॆन्ड्री पाहिला मला आवडला. मी त्यात उच्च अभिरुची मूल्य वगैरे शोधत बसलो नाही. करमणूक झाली. ;तो काही समाज बदलवण्याच्या हेतुने निर्माण केलेला प्रबोधनपट नाही असे 'मला' वाटते. मी खेड्यात लहानाचा मोठा झालो. यामुळे कदाचित तो मला जवळचा वाटला असेल.
प्रकाश घाटपांडे
http://faljyotishachikitsa.blogspot.in/
ज. ब. र. द. स्त.
सगळं वाचत असताना मुखपृष्ठावरची ही कविता पूर्ण वाचायचीच राहिली. कदाचित तिच्या शीर्षकामुळे माझा सबकॉन्शस तिला निकालात काढून, स्टीरीओटाईप करून मोकळा झाला असावा.
माझ्या सबकॉन्शसकडून इतकी घनघोर चूक याआधी झालेली नाहीये.
कविता, अत्यंत आशयघन, रुपके ह्यांचा अतिशय अप्रतिम वापर करून जी घट्ट बांधलेली आहे, त्यात एकही अक्षर इथेतिथे झालेलं नाही, ना त्यातून कवितेचं यमक तुटलंय. चित्रपटाचा इतका सुंदर सारांश दुसरीकडे कुठेही पहायला मिळणार नाही. थोडं ज्वालाग्राही बोलायचं झालं तर जनरली अशा कवितांना एक 'अगतिक' टोन असतो, जो इथे कणमात्रही दिसत नाही. कवितेची अतिशय थेट, आणि रोखठोक भाषा तिच्या अलंकारिक सौंदर्याला कुठेही बाध आणत नाही. हा एक मुद्दा फार म्हणजे फारच अभावाने आढळतो. अजी़म नवाज राही ह्यांनी सुरु केलेल्या 'कल्ट'ची ही कविता प्रतिनिधी म्हणता येईल.
तिज्यायला मजकूर आणि स्वाक्षरीच्या मध्ये डिफॉल्ट एक लाईन मारा की मालक
Hope is for sissies.