पाणी घेऊन आलेत ढग
पाणी घेऊन आलेत ढग
आता पाऊस येईल बघ
वार्यावरती होउन स्वार
धूळ घेईल गिरक्या फार
आभाळ करेल धडालधूम
वीज करेल झगमग झगमग
आता पाऊस येईल बघ
कोकीळ घेईल लंबी तान
नाचेल मोर छान छान
बेडूक करेल डराव डराव
मजाच मजा येईल मग
आता पाऊस येईल बघ
हिरवे हिरवे होईल ऊन
वारा गाईल हिरवी धून
मातिला येईल हिरवा पूर
हिरवे होईल सारे जग
आता पाऊस येईल बघ
- ग्लोरी
प्रतिक्रिया
आलाच!
आलाच!
पहिल्या पावसाच्यादिवशी अतिशय समयोचित कविता
- ऋ
-------
लव्ह अॅड लेट लव्ह!
सुचवण
पहिली ओळ 'पाणी घेऊन आलेत ढग' अशी (किंवा तत्सम कशीतरी) बदलता येईल काय?
अन्यथा, पहिल्या दोन ओळींतील कार्यकारणभाव काहीसा अत्यंत चमत्कारिक असा सूचित होत आहे.
(अर्थात, तो तसा चमत्कारिक असणेच अपेक्षित असल्यास काहीही म्हणणे नाही.)
उर्वरित कविता ठीक आहे.
रोचक रचना
रोचक रचना आहे. "पिऊन"बाबत 'न'वी बाजू यांच्याशी सहमत आहे.
कविता समयोचित आहे.
*माझ्या मनात मात्र कोकिळाच्या गाण्याचा पावसाच्या आगमनाशी संबंध तितकासा घट्ट नाही. चातक (किंवा पपीहा) हे पावसाळी वाटतात. वसंतऋतूशी अधिक संबंध आहे.*
*शिवाय कोकिळाचे कुहु-उ ऐकताना मला "लंबी तान" अशी फारशी भासत नाही.*
*बालकवितेत पाच ओळींची कडवी, ही रचना मोठी आश्चर्यकारक आहे.
क-क (धृ); ख-ख-ग-क-क ; च-च-छ-क-क ; ... ही यमकरचना सुद्धा कल्पक आहे. कडव्यातली मधली ओळ बिनयमकी ठेवण्याचे धाडसही लक्षणीय! "झगमग" हे "बघ"साठी यमक मला उच्चारायला जड जाते आहे.*
बघ या शब्दाचा उच्चार 'बऽघ'
बघ या शब्दाचा उच्चार 'बऽघ' असा होतो त्यामुळे झगमग आणि बघ हे यमक थोडं रोचक वाटलं.
'न'वी बाजू यांची सूचना मलाही पटली.
पण कविता आवडली.
---
सांगोवांगीच्या गोष्टी म्हणजे विदा नव्हे.
बघ या शब्दाचा उच्चार 'बऽघ'
दुसर्या झगमगचा उच्चारही 'झगमऽग' असाच करावा लागतोय.
छान कविता आहे.
उलट
मला याच्या नेमके उलट वाटले.
'झगमग झगमग' हे '....झग्मग-झग्मग' असे म्हटले तर 'आता पाऊस येईल बघ्' (घ पाय मोडून) असे म्हणणे लयीला अधिक जवळचे वाटले. तसेच 'मजाच मजा' हे देखील 'मज्जाच मज्जा' असे वाचले तर जास्त मज्जा येते असा अनुभव. बाकी ही रचना करताना कुठली लय अभिप्रेत होती, हे ग्लोरीच स्पष्ट करू शकतील.
सर्वांचे आभार. नवी बाजू
सर्वांचे आभार.
नवी बाजू यांच्या सुचवणीशी मी सहमत आहे.
पहिली ओळ "पाणी घेऊन आलेत ढग" अशी वाचावी.
धन्यवाद.