बागेतून ताटात - प्रयोग २ : पालेभाज्या
बागेतून ताटात - प्रयोग १ : भोपळा
ह्यावर्षी असं नव्याने जाणवलं की थोडंसं प्लँनिंग आणि नगण्य कष्टात घरची पालेभाजी खाता येते. दर रविवारी २ ट्रे मध्ये हरभरा / मेथी पेरून आठवड्याला एक तरी पालेभाजी होतेच. शिवाय घरी लावलेल्या इतर भाज्यांचा पालापण पालेभाजी करण्यासाठी वापरता येतो.
१. मेथी / हरभरा पातळ भाजी
साहित्य:
हरभरा डाळ, शेंगदाणे, लसूण, तेल, मोहरी, हळद , तिखट -मीठ , (आमसुलं , गूळ - मेथी खूप कडू असेल तर), डाळीचं पीठ १ चमचा ( ऐच्छिक ) आणि मेथी/ हरभरा.
कृती :
- पालेभाजी खुडून, स्वच्छ धुवून डाळ दाण्यांसहित कूकरमध्ये शिजवून घेणे.
- हळद मोहरीची फोडणी करून त्यात ठेचलेला लसूण परतणे.
- शिजलेली भाजी-डाळ-दाणे फोडणीत टाकणे.
- फार चोथा -पाणी होतंय असं वाटलं तर एक चमचा डाळीचं पीठ पाण्यात कालवून लावणे.
- चवीनुसार तिखट -मीठ घालणे.
- मेथी खूप कडू असेल तर ह्यात आमसुलं आणि थोडा गूळ घालणे.
- एक उकळी आली की भाजी झाली.
२. मिश्र पाल्यांची भाजी
साहित्य:
तेल, लसूण, मिरची, मीठ, दाण्याचं कूट आणि बागेतल्या भाज्यांची पानं. ( हरभरा, मेथी, भोपळा, रताळं, बटाटा, वाल)
कृती:
- भाज्यांची पानं स्वच्छ धुवून गरजेप्रमाणे चिरून घेणे.
- फोडणीत ठेचलेला लसूण आणि मिरची परतणे.
- लगेचच वरून चिरलेल्या भाज्या घालून मीठ- दाण्याचं कूट शिंपडून झाकून ठेवणे.
- मध्ये मध्ये झाकण उघडून एकसारखे परतणे.
- पानांचा रंग बदलला की भाजी शिजली असं कळतं.
पुन्हा एकदा, आभार.
पालेभाज्या शिजवण्याबद्दल मला काय शंका राहते. कुकरला लावून त्या अति शिजतात का? पर्याय काय?
---
सांगोवांगीच्या गोष्टी म्हणजे विदा नव्हे.
कुकरला पर्याय इन्स्टंट पॉट :D
कुकरला पर्याय इन्स्टंट पॉट :D ! मी इन्स्टंट पॉटमध्ये नॉर्मल प्रेशरवर ५-६ मिनटं शिजवते.
पण तुझा मुद्दा बरोबर आहे. मी जास्त शिजण्याबद्दल फारसा विचार केला नव्हता कधीच.
-सिद्धि