वाचकांचा अभिप्राय - आंबट-गोड

वाचकांचा अभिप्राय - आंबट-गोड

- ऐसीअक्षरे

पॉर्नांकाचे पिकलेले आंबे पेट्यांतून काढून घरपोच होत आहेत. काही अजून पेंढ्यातच भरून आहेत. रसिक लोक उड्या मारून रस चाखताना दिसताहेत. दरेक आंब्याला काही ना काही वाहवा मिळते आहे हे दिसतं आहे. पण तरीही संपूर्ण पेटीबद्दल लोकांचं काय मत आहे हे जाणून घेण्यासाठी हा धागा. ऐसीतर्फे सादर होणाऱ्या विशेषांकांसाठी खरं तर एकंदरीत अंकाबद्दल मत देण्यासाठी काही विशिष्ट जागा राखून ठेवली जात नाही. कधीकधी वाचक संपादकीयावर प्रतिसाद देतात. पण हे विशेषांक अनेक दिवस प्रसिद्ध होत असल्यामुळे नक्की कायकाय आवडलं, काय आवडलं नाही याबद्दल रेखीव काही हाती लागतंच असं नाही. म्हणून हा प्रयत्न. जमल्यास या विशेषांकापासून प्रतिसादासाठीच्या धाग्याचा पायंडा पाडण्याचा मानस आहे.

या अंकाची दखल महाराष्ट्र टाइम्स, लोकसत्ता, लोकमत, मराठी प्लस अशा वेगवेगळ्या वर्तमानपत्रांमध्ये घेण्यात आलेली आहे ही जमेची बाजू आहे. आत्तापर्यंतचा विशिष्ट लेखांवर आलेला प्रतिसादही बहुतांशी सकारात्मक आहे. या सगळ्यामुळे संपादक मंडळाच्या अंगावर महिनाभर आंबे ओरपल्याप्रमाणे मुठीमुठींनी मांस चढलेलं आहे. पण तरीही आत्ता जेमतेम निम्मा अंक प्रकाशित झालेला आहे. तेव्हा ऐसीचे चोखंदळ वाचक या अंकाबद्दल तोंडात चव ताजी असताना काय म्हणतात ते जाणून घ्यायची इच्छा आहे. तेव्हा आंबट-गोड, रसाळ-पाणचट, कच्चा-पिकलेला-जास्त झालेला... जी काही चव लागली ती जरूर कळवा. यातून पुढच्या अंकांसाठी आम्हाला शिकायला मिळेल.