कवितेत भेटती-

Submitted by anant_yaatree on शनिवार, 10/08/2024 - 14:02

कवितेत भेटती डोह कधी
कधी कोडे सहज न सुटणारे
कधी आभासी जगतामधले
अस्पर्श्य, अलख, मोहविणारे

कधी लाट विप्लवी, विकराळ,
फेसाळ, किनारी फुटणारी,
शोषून उषेचे सर्व रंग,
नि:संग, निळीशी उरणारी

कधी व्याधविद्ध मृगशीर्षासम
मिथकांशी पाऊल अडखळते
कधी चंद्रधगीच्या वणव्यातून
नक्षत्र वितळणारे दिसते

कधी ओळींच्या मधली जागा
उत्कट ऊर्जेने लवथवते
शब्दातून अवचित ओथंबत
अलगद काही हाती येते

field_vote: 
0
No votes yet