छायाचित्रण पाक्षिक-आव्हान १६ : संध्याकाळ

ऋता

पुढच्या पंधरवड्यासाठी विषय आहे : संध्याकाळ.

या विषयाचबद्दलही अधिक काही स्पष्टीकरण/अपेक्षा द्यायची गरज नाही. तसा सोपा विषय म्हणता यावा. अर्थ किती व्यापक असू शकतो हे चित्रांमधूनच पाहू !

------

स्पर्धेचे नियम पुढीलप्रमाणे आहेत:

१. केवळ स्वतःने काढलेले छायाचित्रच स्पर्धेच्या काळात स्पर्धेसाठी प्रकाशित करावे. मात्र स्पर्धा काळ संपल्यानंतर, निकाल घोषित झाल्यावर त्याविषयाशी संबंधित इतरांची, इतरत्र पाहिलेली चित्रे योग्य परवानगी घेऊन इथे टाकल्यास हरकत नाही किंवा स्पर्धाकाळात टाकलेले इतरांचे चित्र स्पर्धेसाठी धरले जाणार नाही.

२. एका सदस्याला जास्तीत जास्त ३ चित्रे स्पर्धेसाठी प्रकाशित करता येतील. जर/जी छायाचित्रे स्पर्धेसाठी नसतील तर प्रतिसादात ठळकपणे तसे नमूद करावे.

३. आव्हानाच्या विजेत्यास पुढील पाक्षिकात आव्हानदाता आणि परिक्षक व्हायची संधी मिळेल. अर्थात आधीच्या आव्हानाचा विजेता पुढील पाक्षिकाचा विषय ठरवेल आणि विजेता घोषित करेल. (मग तो विजेता त्यापुढील पाक्षिकाचा आव्हानदाता व निरीक्षक असे चालू राहील.)

४. ही स्पर्धा २ आठवडे चालेल. म्हणजे आज सुरू होणार्‍या स्पर्धेचा शेवट १३ फेब्रुवारी रोजी भा.प्र.वे.नुसार रात्री १२:०० वाजता होईल . १४ फेब्रुवारीच्या गुरुवारी विजेता घोषित होईल व तो विजेता पुढील विषय देईल.

५. पाक्षिक आव्हानाच्या धाग्यावर प्रकाशित झालेल्या चित्रांच्या तंत्रावर शंका विचारण्यावर, निकोप टिपण्या करण्यावर बंदी नाही. मात्र हे आव्हान आहे हे लक्षात घेऊन जिंकण्यासाठी/हरवण्यासाठी उगाच एखाद्याला टीकेचे लक्ष्य करू नये अशी विनंती. अर्थात तुम्हाला हव्या त्या चित्रांबद्दल मुक्त, निकोप चर्चा करण्यास प्रोत्साहन देण्याचेच धोरण आहे.

६. आव्हानाचा विजेता घोषित करण्याचे पूर्ण अधिकार आव्हानदात्यांचे असतील. त्यासाठी त्याने ठराविकच निकष लावावेत असे बंधन नाही. त्याने आव्हान द्यावे व त्याचे आव्हान कोणी सर्वात उत्तम पेलले आहे ते ठरवावे इतके ते सोपे आहे. शक्यतो ३ क्रमांक जाहीर केले जातील.(मात्र पुढील पाक्षिकात फक्त प्रथम क्रमांकाचा वीरच आव्हानदाता असेल). आव्हानदात्याकडून काय आवडले हे सांगण्याचे बंधन नसले तरी अपेक्षा जरूर आहे.

७. आव्हानदात्याला प्रथम क्रमांकाचा एकच आव्हानवीर घोषित करणे बंधनकारक आहे.

८. आव्हानात स्पर्धेसाठी प्रकाशित चित्रे प्रताधिकाराच्या दृष्टीने निकोप असावीत अशी अपेक्षा आहे.

९. आव्हानदाता स्वतःची चित्रे प्रकाशित करू शकतो मात्र ती स्पर्धेत धरली जाणार नाहीत.

१०. कॅमेरा व भिंगांची माहिती देणे बंधनकारक. शक्य असल्यास इतर तांत्रिक तपशील द्यावेत.

सूचना : 'ऐसी अक्षरे' संकेतस्थळावर आपली चित्रे कशी प्रदर्शित करावीत, याबद्दल अधिक मार्गदर्शन या धाग्यावर आहे. त्याचा लाभ घ्यावा.

चित्रे या संकेतस्थळावर टाकताना, जर Width आणि Height (दोन्ही) दिली नाही तर ते फोटो इंटरनेट एक्सप्लोरर् (९) वर दिसत नाहीत. (पण फायरफॉक्सवर दिसतात.) यावर उपाय म्हणजे Width आणि Height दोन्ही रोमन अंकांमध्ये द्यावेत किंवा त्यांचा उल्लेखच इमेज टॅगमधून वगळावा. कृपया याची नोंद घ्यावी.

मागचा धागा: विषय - प्रतिबिंब.

स्पर्धा का इतर?

बॅटमॅन Thu, 31/01/2013 - 16:40

हा फटू पाहून मनात आलं की आम्रिकेत शेतीची जर चांगली सोय असती तर इथेही मस्त संस्कृती उदयास येऊन गनिमी काव्याने एकापेक्षा एक लढाया झाल्या असत्या. :)

अमुक Thu, 31/01/2013 - 20:20

ज्या चित्रान्त सूर्यप्रकाशाच्या छटाम्मुळे सन्ध्याकाळ आहे हे दर्शविले जाईल, अश्या चित्रान्त (केवळ चित्र पाहून) वेळ सकाळची आहे की सन्ध्याकाळची आहे हे निश्चित कळण्यास काही मार्ग आहे का ? उगवतीचे आणि मावळतीचे रङ्ग बरेचदा सारखे असतात.

ऋषिकेश Fri, 01/02/2013 - 09:59

खर आहे. मला काही वेळा हा फरक ओळखता येत नाही (हे आधीच कबुल करतो नाहितर प्रतिक्रीयेत दोन फोटो यायचे ;) )
रंगात बराच सारखेपणा असला तरी मावळतीचे रंग अधिक उष्ण असतात, तर उगवतीचे सौम्य असतात. केवळ आकाशातील रंगच नव्हे तर स्थिरचरांचे चित्रही उगवतीला घेतले असता शीतल दिसते तर मावळतीला ते अधिक उष्ण भासते.

तसे अनेकदा असे म्ह्टले जाते की संध्याकाळी अनेकदा आकाशात क्षितीजापाशी ढग असतात तर बर्‍याचदा उगवतीच्या वेळी आकाश क्षितीजापाशी निरभ्र असते, मात्र हा थंब रुल झाला. मात्र रंगाची सौम्यता/उष्णता अधिक चांगला मापदंड होईल.

अर्थात हे अंदाज झाले प्रत्यक्ष ज्या ठिकाणचा फोटो आहे तेथील माहिती असल्यास दिशा समजू शकतात अन्यथा अश्या अनुमानावरच जावे लागते. या दुव्यावर एकाच ठिकाणची दोन वेळी काढलेली काही चित्रे पाहता येतील

३_१४ विक्षिप्त अदिती Fri, 01/02/2013 - 21:37

दिवसभराच्या उष्णतेमुळे आणि माणसांच्या वर्दळीमुळे संध्याकाळच्या आकाशात बरेच जास्त धूलिकण असू शकतात. उन्हाळ्याच्या दिवसांमधे हा फरक अधिक जाणवत असावा. सूर्योदय लवकर होतो, दिवस लांबल्यामुळे हवा अधिक कोरडी होते, त्यामुळे धूलिकणांचं प्रमाण वाढतं. सूर्योदयाच्या वेळेस पश्चिमेला गुलबट रंग फार दिसत नाही, पण सूर्यास्ताच्या वेळेस पूर्वेला हा रंग अनेकदा दिसतो.

---

शिवाय संध्याकाळी कातरवेळ का कायशी असते, त्यामुळे लग्न झालेल्या बायका प्रियकराच्या आणि/किंवा माहेरच्या आठवणीने रडतात, समईच्या शुभ्र कळ्या लावतात, मुलं शुभंकरोति वगैरे म्हणतात, वयस्कर लोकं नॉस्टॅल्जिक होतात. शिवाय संध्याकाळी दिवसभराच्या कामाने शीण आलेला असतो. तो घालवायला पुरुष दारवा पितात.

अनामिक Fri, 01/02/2013 - 23:04

शिवाय संध्याकाळी कातरवेळ का कायशी असते, त्यामुळे लग्न झालेल्या बायका प्रियकराच्या आणि/किंवा माहेरच्या आठवणीने रडतात, समईच्या शुभ्र कळ्या लावतात, मुलं शुभंकरोति वगैरे म्हणतात, वयस्कर लोकं नॉस्टॅल्जिक होतात. शिवाय संध्याकाळी दिवसभराच्या कामाने शीण आलेला असतो. तो घालवायला पुरुष दारवा पितात.

म्हणजे संध्याकाळ ह्या विषयावरचे फोटू कुठले असू शकतात त्याची हिंटच आहे की ही!

अमुक Mon, 04/02/2013 - 00:23

ढग एखादा मोरपिसार्‍यावरी डवरतां
पसरायाची घरावरी माझ्याच सावली
समजत नव्हते सनई ऐकून दुखायचे का
आतुन डोळे त्या दिवशीच्या संध्याकाळी..

- आरती प्रभु.

३_१४ विक्षिप्त अदिती Mon, 04/02/2013 - 22:50

एक चित्र पाहून सकाळ का संध्याकाळ आहे हे सांगणं कठीण आहे याच्याशी सहमत.

दिवसा वारे जमिनीवरून वाहतात (मतलई वारे) त्यामुळेही अधिक धूलिकण हवेत असतात. रात्री समुद्रावरून येतात (खारे वारे) त्यामुळे हे धूलिकण कमी होतात. हे एक आणखी नंतर सुचलं.

धनंजय Tue, 05/02/2013 - 02:21

खार्‍या वार्‍यात तुषार असतात, आणि तुषार वाळले की मिठाचे बारीक कण असतात. हे विसरून चालणार नाही.

अमुक Mon, 04/02/2013 - 00:19

चित्रे आवडली ! विशेषत: पहिले. जर्मनीतल्या स्थानकांवरची साचेबद्ध सन्ध्याकाळ..

तिसर्‍या चित्रातली जागा जर्मनीतलीच आहे ?

आबा Mon, 04/02/2013 - 19:41

हो, तिन्ही छायाचित्रे जर्मनीतलीच आहेत.

अवांतर : खरं तर त्या पहिल्या चित्रामध्ये घरी परतण्याची वेळ सूचीत करायची होती, दुसर्‍यामध्ये आणि तिसर्या मध्ये कातरवेळ. पण कितपत जमले आहेत माहित नाही. फोटोग्राफी शिकायचा प्रयत्न चालू आहे

आबा Mon, 04/02/2013 - 19:35

१) पहिले चित्र
ISO 450
Exposure 1/30 s
Focal Length 16.3 mm
Aperture f/4.0
Flash Used False

२) दुसरे चित्र
ISO 400
Exposure 1/640 s
Focal Length 9.4 mm
Aperture f/8.8
Flash Used False

३) तिसरे चित्र
ISO 160
Exposure 1/500 s
Focal Length 5.9 mm
Aperture f/3.8
Flash Used False

रुची Mon, 04/02/2013 - 03:17

१) ही वाट दूर जाते...संध्याकाळचं स्वप्न. (कॅमेरा - आयफोन)

Sandhakal-1

२) एकाची संध्याकाळ (कॅमेरा Canon DIGITAL IXUS i, f5.6, 1/320 Sec)

Sandhakal-2

३) गुंता (कॅमेरा NIKON D90, f3.3, 1/25 Sec)

Sandhakal-3

वाचक Thu, 07/02/2013 - 05:56

1. घरांची रांग - संध्याकाळच्या वेळी

OLYMPUS E-PL1 with Nikon AIS 35-135mm F3.5

camera: olympus E-PL1 with Lens: Nikon AIS 35-135mm F3.5 manual focus set at F8 / 130mm /ISO: 320

2. क्लॉक टॉवर, संध्याकाळचे ५
OLYMPUS E-PL1 with Canon FD 50mm f1.8

Camera: Olympus E-PL1 with Lens: Canon FD 50mm F1.4 manual focus set at F4 / 50mm / ISO: 800

3. तळ्याकाठची संध्याकाळ
OLYMPUS E-PL1 with Minolta MC W.Rrokkor-HG 35mm f2.8

Camera: Olympus E-PL1 with Lens: Minolta Rokkor 35mm F2.8 set at F5.6 / 35mm / ISO: 125

ऋषिकेश Fri, 08/02/2013 - 10:34

श्रेयअव्हेरः हे चित्र स्पर्धेसाठी नाही आणि मी काढलेले देखील नाही. महाराष्ट्रटाईम्सच्या इका बातमीत इथे दिसले. ते विषयाला साजेसे वाटल्याने इथे देत आहे

अमुक Tue, 12/02/2013 - 08:55

दोन हे आहेत फोटो
आपुले नाही जणू
कोणता आहे तुझा अन्
कोणता माझा म्हणू ...
;)

सन्दर्भ : हे घासकडवीञ्चे चित्र पाहून मला चटकन् त्याञ्च्याच 'दोन' या आव्हानात दिलेल्या या चित्राची आठवण झाली. त्या चित्रामुळे सध्याच्या आव्हान-धागाकर्त्या ऋता यान्ना त्यावेळी एका आरती प्रभूञ्च्या कवितेची आठवण झाली होती. ते हे गाणे.

३_१४ विक्षिप्त अदिती Tue, 12/02/2013 - 09:55

हे ग्लास तेच असले तरी पेय्य तेच नाही, दिवसाची वेळ वेगळी होती आणि दिवसही वेगळा होता.

दोन आहेत हे ग्लास
आपुले नाही खरे
झाले रिते तेव्हा मलाही
वाटले नाही बरे
(उगाच ट-ला-ट)

अमुक Tue, 12/02/2013 - 19:51

खरे आहे. पण हवे ते टिपण्याच्या नादात त्या मुलीची तन्द्री भङ्ग करण्यात हाती धुपाटणे येण्याची शक्यता होती ;) , म्हणून आवाज न करता जे मिळाले ते मिळाले. शीर्षक देऊन ती उणीव भरून काढायची मनात होते, पण नन्तर तो बेत रहित केला.

रुची Wed, 13/02/2013 - 23:52

छानच. कल्पना आणि तंत्र दोन्ही छान जमून आलंय तुमच्या सर्वच प्रकाशचित्रांत.

बाबा बर्वे Wed, 13/02/2013 - 15:36

मोबाइल मधुन काढलेला फोटो असल्याने बाकी माहिती देता येत नाही ...

मी Wed, 13/02/2013 - 21:39

१) संध्याकाळ (निकॉन डी-५०, १८-५५ लेन्स)



२)संध्याकाळ (निकॉन डी-५०, ५५-२०० लेन्स)



३)संध्याकाळ (निकॉन डी-५०, ५५-२०० लेन्स)



४)संध्याकाळ (निकॉन डी-५०, १०-२० लेन्स)



५)संध्याकाळ (निकॉन डी-५०, १०-२० लेन्स)



६)संध्याकाळ (निकॉन डी-५०, १०-२० लेन्स)



७)संध्याकाळ (निकॉन डी-५०, १०-२० लेन्स)



८)संध्याकाळ (निकॉन डी-५०, १०-२० लेन्स)



९)संध्याकाळ (कॅनन पॉवरशॉट ए-९५)



१०)संध्याकाळ (कॅनन पॉवरशॉट ए-९५)

रुची Wed, 13/02/2013 - 23:56

नंबर चार आणि सात विशेष आवडले. कुठे काढले आहेत हे? स्थळाबद्द्लही लिहिलेत तर आवडेल.

मी Thu, 14/02/2013 - 20:12

धन्यवाद, दोन्ही छायाचित्रे युत्रेख(हॉलंड)मधील आहेत, पहिले छायाचित्र दोन कालव्यांच्या संगमावरचं आहे, दुसरं छायाचित्र युत्रेखच्या प्रसिद्ध डोम चर्चच्या समोरच्या कमानींचं आहे,

इतर-** पहिलं छायाचित्र उन्हाळ्यातल्या संध्याकाळचं असल्याने चंद्र पण टिपला गेला आहे, दुसरं छायाचित्र सातार्‍याजवळ(शिरवळ) निरेकाठचं आहे, तिसरं दिवेआगारच्या समुद्रकिनारचं आहे, पाचवं युत्रेखच्या डोम-चर्चचं आहे, त्याचा इतिहास वाचण्यासारखा आहे, सहावं युत्रेख मधल्या एका छोट्याश्या बागेचं आहे, आठवं युत्रेखच्या एका कालव्याचं आहे, हे शहर नितांत-सुंदर आहे, नववं न्यु-जर्सीतलं हडसन नदीकाठचं आहे, त्यात काही भाग गोल्डमन सॅक्सच्या बिल्डींगचा आहे, दहावं चित्र मार्लबोरोमधल्या एका तळ्याकाठचं आहे. **

अमुक Thu, 14/02/2013 - 00:42

चौथे विशेष आवडले.
या चित्रासाठी पोलराइज़र वापरला आहे का ? असेल, तर अधिक उत्कृष्ट करता आले असते असे वाटले.
कृपया कॅमेरा व भिङ्गाच्या माहितीसोबत इतर (Exposure time, ISO आणि Shutter Speed) माहिती द्यावी.
तसेच परीक्षिकेच्या सोयीसाठी कुठली ३ चित्रे स्पर्धेसाठी देत आहात ते स्पष्ट करावे.

मी Thu, 14/02/2013 - 20:15

धन्यवाद, पोलराइजर वापरले नव्हते, पण तुम्ही म्हणता त्याप्रमाणे वापरले असता चित्र अधिक छान आले असते. चित्राची तांत्रिक माहिती देणे कष्टप्रद काम आहे, पुढील वेळी मी ते नक्की देईन.

ऋता Thu, 14/02/2013 - 15:27

स्पर्धेत भाग घेता/ न घेता यात सहभागी झाल्याबद्द्ल आभार.
संध्याकाळ या विषयाशी निगडीत विविध कल्पना पहायला मिळाल्या: मावळतीचे रंग (कोणत्याही वेळी टिपलेले का असेनात ! (अमुक यांच्या शंकेला स्मरून)), सूर्यास्त, दिवेलागण, कामावरून घरी परतण्याची वेळ, वाट पहाण्याची वेळ, दिवसाचा थकवा मनोरंजनाने दूर करण्याची वेळ, खरेदी करण्याची/फिरण्याची वेळ, किंवा मवळतीला पडणारा सोनेरी प्रकाश आणि त्यातल्या लांब सावल्या बघत चिंतन करण्याची वेळ....अशा कितीतरी.
काही चित्र त्यातल्या रंगांमुळे लक्ष वेधून घेतात: अनामिक (चित्र १), रूची (गुंता), वाचक (घरांची रांग - संध्याकाळच्या वेळी), मी (चित्र ३)
अमुक यांचा 'सांजगजबज' हा फोटो वेगळ्या विषयामुळे आवडला...पण त्यात मागचे दिवे आणि इमारती शार्प (गर्दीची 'गजबज' राखून) असत्या तर आणखीन आवडला असता. ऋषिकेश यांनी दिलेला 'नदीकिनारी सरत्यावेळी' सुद्धा आवडला पण स्पष्ट हवा होता (मोबाइल कॅमेर्याची मर्यादा). राजेश घासकडवींचा 'तो न चंद्रमा नभात...' (दोन पेले) सुद्धा छान कल्पना...पेल्यातून डोकावणारा सूर्य खासच आहे.

तरी काही चित्र पाहिल्या बरोबर एक गोष्ट सांगून गेली...(नाव नसलेली चित्र कोणती ते पटकन कळावं म्हणून '[]' कंसात नावं मीच दिली आहेत.)
विजेती चित्र :
तृतीय क्रमांकः अमुक (चित्र २) [वाट पहाणारी चिमुरडी]
द्वितीय क्रमांकः राजेश घासकडवी (कबुतरावलोकन)
प्रथम क्रमांकः आबा (चित्र १) [आता घरी जायचं]

अभिनंदन !

आबा*...पुढचा विषय द्या.

*आबा, तुमचा कॅमेरा कोणता ?

आबा Thu, 14/02/2013 - 18:03

थँक यू,
माझ्याजवळ Nikon s9000 कॅमेरा आहे.
पुढचा विषय दोन दिवसात टाकतो

अवांतर: मला स्वतःला घासकडवींचा पेल्याचा फोटो आवडला