(शक्य असल्यास ) तातडीने मदत हवी आहे

अश्याच, किंबहुना याहून विचित्र अनुभवातून गेलो आहे. रकमाही यासमच. मीटर गायबच होणे असाही उपप्रकार या सर्वात अ‍ॅडिशनल होता.

अजूनही तो प्रॉब्लेम मुळापासून सोडवता आलेला नाही, पण किमान नवीन मीटर जागी परत बसण्याइतकी प्रगती झाली आहे.

एक सर्वात महत्वाचं म्हणजे,

१. आत्ता ते अकरा हजार भरुन टाका. नपेक्षा उन्हाळ्याच्या दिवसांत तत्परतेने सद्य चालू वीजही अत्यंत कार्यक्षम चपळाईने कापली जाईल. चुकीच्या का होईना, पण वीजबिलाच्या पेमेंटस्वरुपात खात्यात भरलेली रक्कम सुरक्षित असते. तिचा अपहार कोणी करु शकत नाही. न भरल्यास आडमार्गाने अपहार करणं यंत्रणेला सोपं जातं. नंतरच्या न्यायासाठी झगडा वगैरेवर पैसे न भरल्याचा सुपरिणाम तर राहोच पण दुष्परिणाम भरपूर होतो. अनुभवातून शहाणपण. अन्याय्य चुकीच्या बिलाचे ते पैसे न भरल्याने आपण "सेफर साईड"ला राहू ही चुकीची समजूत आहे. अनेक लाखांची रक्कम असती तरच न भरण्यात अर्थ आहे. रक्कम भरणं म्हणजे ती मान्य करणं नव्हे.

२. एमएसईबीची वीज असल्यास महाडिस्कॉम वेबसाईटवर ग्राहक क्रमांकाने लॉगिन करुन आपली मागच्या पूर्ण वर्षाची यूसेज हिस्टरी अर्थात वापराचा इतिहास काढा. त्याचा प्रिंटआउट अर्जात जोडल्याने महिनोन महिने कमी युनिट्स वापरण्याचा इतिहास असलेल्या घरात अचानक एका महिन्यात अनेकपट जास्त वीज वापरली जाणं कसं अतार्किक आहे हे मांडणं सोपं जाईल. या मांडणीमुळे आणि नंतर मीटर जळल्याच्या फॅक्टमुळे मीटर फॉल्टी होता असा दावा करण्याला बळ येईल.

३. मीटर फॉल्टी असल्याचं उपरोक्त अर्जामुळे मान्य झाल्यास नंतर ते अकरा हजार खात्यावर जमा पडलेले राहून अनेक महिने बिल शून्य येईल.

४. ऑनलाईन महाडिसकॉम साईटवरही कंप्लेंट टाका. त्यावर काडीचीही अ‍ॅक्शन होईल असं नव्हे, पण आपण सर्व मार्गांनी हरकत नोंदवली हे सिद्ध करण्यासाठी पुढे उपयोग होईल.

५. सध्या दर दिवशी दिनांती मीटर रीडिंगचा एक फोटो काढून ठेवत रहा.

तुमच्याकडे मीटर जळाल्याच्या आदल्या दिवशी काढलेला फोटो आहे का?
नसेल तर माहितीच्या अधिकारात त्या दिवशीच्या मीटरचा फोटो मागवता येईल. आधीच्या बिलावर पूर्वीचा फोटो असेलच. फरक काढून बघता येईल
मात्र त्यातही ११००० रु बिल होऊ शकेल असे रिडिंग - फरकाचा आकडा - असल्यास काही विशेष करता येईलसे वाटत नाही.

तुमचे आधीची बिले रिडिंगसह यायची की आधीचा ट्रेंड फॉलो करून?

हे मोट्ठे बिल आणि मीटर जळणे याचा काहीतरी संबंध असावा. मोठे काहीतरी लोड त्यावेळी मीटरवर असावे. मे बी सम डायरेक्ट लीकेज बिटविन फेज & न्यूट्रल.

@मन - तुमच्या मिटरवरुन कोणी वीज चोरी करत होते का हे ही बघा. वीज चोरी मुळे बील पण जास्त येणे आणि लोड जास्त झाल्यामुळे मिटर जळणे हे दोन्ही होऊ शकते.
पण गवि म्हणतात तसे ११ हजार आधी भरा, नाहीतर आहे ती वीज पण तोडुन टाकतील ही लोक.

:( वाचून वाईट वाटले. फुकाचा भुर्दंड.

एकंदर वाईट प्रकार आहे. सल्ला देण्यासारखा माझ्याकडे काही अनुभव नाही.

आताच एम एस ए बी च्या हापिसात जाउन आलो. डेप्युटी इंजिनिअर सायबाला भेटलो. त्यांनी जुने मीटर जळून जाण्यापूर्वी फोटो घेतला होता का ते विचारले. तो मागच्या भेटित मला मिळालेला होता.(त्यांच्या सहकार्‍यांकडे तो होता, त्याचीच प्रिण्ट मी काढून घेतली होती.) तो आम्ही दाखवला.
त्यांना मागची सगळी इ-बिले दाखवली.(इंटारनेटवरुन प्रिण्ट आउट काढलेली.)
.
.
त्यांनी ती पाहिली. पण पुरेशी नाहित असे सांगितले. इंटरनेटवरील बिलात नुसतेच बिल दिसते. मात्र घरी जे रंग्गीत(निळसर शाईतले) बिल एम एस इ बी पाठवते; त्यात बिलासोबत मीटर रिडिंगचा फोटोही असतो. तसे एखादे बिल आहे काय, अशी त्यांनी विचारणा केली. सुदैवाने तशी मागच्या दोन तीन महिन्यातली बिलेही सोबत गेलो होतो.
ती जुनी बिले, त्यावरचे फोटोही त्यांनी पाहिले. (ज्यात फारसे युनिट्स ह्यापूर्वी वापरले गेलेले नाहित हे दिसतच होते.)
त्यांनी सांगितले की जवळच्याच अजून एका हापिसात एम एस इ बी च्या. तिथल्या मी सांगतो त्या माणसाला लोड टेस्टिंगसाठी अर्ज द्या.
तो रिपोर्ट आणा. नवीन मीटर बसवून दोनेक आठवडेच झालेत तरी त्याची ह्यादरम्यानची रिडिंग व फोटोही त्या रिपोर्ट सोबत आणा.
.
.
मी अर्ज घेउन त्या दुसर्‍या हापिसात गेलो एम एस इ बी च्या. पण ज्या माणसाला भेटायला ह्यांनी सांगितले होते ती व्यक्ती तिथे नव्हती.
त्यासाठी सकाळी साडे नऊ दहा वाजताच यावे लागेल असे तिथल्या द्रारपालकाकांकडून सांगण्यात आले.
( द्रारपालकाकां = चपराशी; पण हा शब्द वापरणे उचित वाटत नाही, त्यास तुच्छतादर्शक अर्थच्छटा आहे.
पर्यायी शब्द म्हणून इम्ग्लिश मधील "प्यून/पिउन" म्हणावे तर जालावर तसेही म्हणता येत नाही.
मराठी भाषेतील मजकूर वाचताना "पिउन" हे नाम न वाटता क्रियापदच वाटते.)
.
.
बाकी, तुम्हा सगळ्यांचे आभार. समस्येतून सुटलो की कळवतोच.

तुमच्या मिटरवरुन कोणी वीज चोरी करत होते का हे ही बघा. वीज चोरी मुळे बील पण जास्त येणे आणि लोड जास्त झाल्यामुळे मिटर जळणे हे दोन्ही होऊ शकते.
पण गवि म्हणतात तसे ११ हजार आधी भरा, नाहीतर आहे ती वीज पण तोडुन टाकतील ही लोक.

हा जाहिर फोरम आहे. आणि माझ्याकडे काही पॉइण्टर्स असले तरी ठोस म्हणावं काहीही नाही. शिवाय जर राजरोस ती तक्रार करायची असेल तर आपल्याकडली व्यवस्था(मोअर स्पेसिफिकली तपासयंत्रणा) म्हणजे....
असो. भारतात सामान्य माणसाला काही मर्यादा असतात. काही कॉस्ट्-बेनिफिट रेशोचा विचार करावा लागतो.
.
.
@संपादक मंडळ :-
हा धागा मुलात "मनातले लहान मोठे प्रश्न " ह्यामध्ये टाकता आला असता; पण मग मला ऐसी सदस्यांचं लक्ष वेधून नसतं घेता आलं. वेगळ्या धाग्यानं अधिक लक्ष वेधून घेतलं जाइल, आणि मदत होण्याची अधिक शक्यता निर्माण होइल म्हणून वेगळा धागा काढला. एकदा म्याटर क्लिअर झाल्यावर हे सगळं तिकडं हलवलं तरी माझी काहीही हरकत असणार नाही.

चुकून मोठे बिल आल्यास ते कमी करून घेता येते (किमान येत होते.) जेव्हा एमएसईबी होती तेव्हा मी स्वतः अर्ज देऊन वर्षभराची बिलं दाखवून आलेले बिल चुकिचे आहे असा अर्ज केला होता आणि बिल कमी करून मिळाले होते. अर्थात, पुर्वीची मिटर्स जास्त 'फॉल्टी' होती आतापेक्षा.

अ‍ॅव्हरेज युनिट कन्झम्प्शन प्रमाणे वगैरे बिल करता येइल. आधी मीटर तपासणी, लोड टेस्टिम्ग करुन घ्या. त्यासाठी अर्ज द्या वगैरे सांगण्यात आले. अर्ज दिला. लोड टेस्टिंगचा रिपोर्ट वगैरे आला. तो एका महाडिस्कॉम(एम एस इ बी) च्या एका ऑफिसकडून दुसर्‍या ऑफिसकडे गेलाही. पण "ह्या रिपोर्टमध्ये पुरेसे तपशील नाहित; योग्य ते तपशील नाही. रिपोर्ट नीट पूर्ण करुन आणा" असा शेरा मिळाला. आता हा जो काय लोड टेस्टिंग रिपोर्ट आहे; त्यातले तांत्रिक तपशील वगैरे आम्हाला कसे ठाउक असतील ? शिवाय तो रिपोर्ट परस्पर एका ऑफिसकडून दुसर्‍याकडे गेला. आमचा संबंध नाही. पण आम्हाला "पुन्हा एकदा आख्खी प्रोसेस करुन आणा" असे सांगण्यात आले आहे.
त्याच वेळी, ज्यांनी रिपोर्ट बनवायला हवा; त्या साहेबाची आताच बदली झालेली आहे. नवे साहेब दोन-चार दिवसात(बहुतेक ८ जून रोजी) जॉइन करतील म्हणे. त्या नव्या साहेबाला पुन्हा पहिलेपासून सर्व कथा सांगत बसावी लागणार.......
.
.
अडचण अशी की हे सगळं सतत करत राहणं; ह्याचा पाठपुरावा करणं; हे मला सारखं सारखं ऑफिसमधून सुटी काढून वगैरे करत राहणं शक्य नाही. ह्या कामासाठी तसाही मी मागील दोन चार आठवड्यात बराच अनुपस्थित राहिलो आहे. माझ्या जॉबवर ह्याचा परिणाम होउ न देणे दिवसेंदिवस अवघड होत आहे. एक अगतिकता जाणवत आहे.

च्यायला. शहरातल्या, शिकल्यासवरलेल्या माणसाचं हे असं भजं होत असेल; तर कोपर्‍या कापर्यातल्या गावातल्या किंवा आदिवासी वस्तीवरच्या सरकारच्या दृष्तीनं "क्षुल्लक" माणसाचं सरकारकडून काय होत असेल ?

शिवाय, ह्यासंदर्भात खासदारांच्या ऑफिसातून काही मदत होते आहे का ते पाहण्यासाठी तिथेही चकरा मारल्या. जनतेचे प्रतिनिधी म्हणून अडल्या नडल्या कामांत तिथून मदत होउ शकते; काही अडलेली कामे पूर्ण होउ शकतात असे मला वाटले होते. पण तिथे गेल्यावर खासदार ऑफिसातल्या सायबानं (बहुतेक खासदारांच्या पी ए नं) पुन्हा एम एस इ बी मधील चिफ इंजिनियर फोन लावून सांगितले "बघा जरा कामाचं " म्हणून. आम्हालाही "ते म्हणतात तसे करा" सांगितले. आम्ही "ते ऑलरेडी करतच आहोत; पण काम होत नाहिये." हे सांगितल्यावर पी ए सायबानंही एवढं सगळं करण्यापेक्षा आख्खं बिल भरुन टाका म्हणत आम्हालाच convince करणे सुरु केले. समजायचे ते समजलो. त्यांचे आभार मानून पुढील कामाला लागलो.

कांही वर्षांपूर्वी आम्हाला एका महिन्यात नेहमीच्या १५००- २००० ऐवजी एकदम ९६००० बील आले (दोन महीन्यांचे). त्यापूर्वी मीटर जास्त पळत आहे (तेंव्हा ती पळणारी मीटरे होती) अशी तक्रार दिलेली होती. वर्षभर झन्टलमन प्रमाणे अर्ज-विनंत्या केल्या. किमान ५ कार्यालयांत चकरा मारायला लावायचे. शेवटी छोट्या सायबाला 'तुज्यासमोर आत्मदहनच करतो' अन मोठ्याला प्रेसमध्ये जातो असे सांगितल्यावर वर्षभराचे १९००० भरायला सांगून त्यानी विषय निकाली काढला. दरम्यान २ वेळा वीज तोडायला आलेल्याना मात्र थोडे 'समजावून' सांगावे लागले! इमारत ही व्यक्तीगत घर नव्हती- त्या वस्तीत लोकप्रिय असलेले आरोग्य केन्द्र होते.

महाराष्ट्रात वीजेचे दर काय आहेत? स्लॅबवाईज?
---------------------------------------------------------------------------------------
घरात एसी वा ऑयल हिटर असेल तरी,१६-१८ तास लावला, घरी सदैव कोणी असलं तर:-
१. पुण्यात वीज बिल कमी येणे समजू शकतो. दुपार सोडली तर वातावरण बरे असते. पाऊस जस्ट चालू होण्यापूर्वी फक्त ७-८ दिवस रात्री उकडते. अन्यथा पुणे इज कूल. पुण्यात एसी लावला तरी ह्यूमिडिटी नसल्याने बिल कमी यायला पाहिजे.

२. मुंबईत एसी असेल तर प्रचंड बिल यायला पाहिजे, कारण तिथे ह्यूमिडिटी खूप आहे. हा लोड ड्राय कूलिंग पेक्षा खूप जास्त असतो.

३. दिल्लीत तरी उकाड्याच्या महिन्यांत वीज बिल खूप येते. ह्यूमिडीटी चिकार असते. अगोदर दोन महिन्यांचे बिल यायचे. मी इथे ८ वेगवेगळ्या घरांत २००४ पासून बिले भरली आहेत. सर्वत्र मे ते ऑक्टोबर मधे अगोदर दोन महिन्याचे ९००० रु बिल यायचे. विजेचे दर वाढत राहिले. तेव्हा २०१२, २०१३ मधे खासकरून उकाड्यात दोन महिन्याचे १०००० ते १४००० रु बिल येते.

आता गेल्यावर्षापासून दर महिन्याला एक बिल येते. फेब, मार्च, एप्रिल, मे, जून (पहिला हाफ), नोव, डिसें (पहिला हाफ) मधे कमी बिल येते. १००० ते २००० प्रतिमाह. पण गेल्यावर्षी उकाड्यात ६००० ते ९००० प्रतिमाह बिल आलेले आहे.

आता हे मी राहिलेल्या सगळ्याच घरांचं आहे, आणि तिथल्या शेजार्‍यांचं पण थोडफार असंच बिल आहे.
---------------------------------------------------------------------------------------------
मनोबा, तू घरात २ टनाचा अव्याहत एसी तर लावलेला नाही ना?
१. कारण त्याने युनिट कंजंशन मागे यायचे त्याच्या दुप्पट चौपट सहापट येऊ लागते.
२. युनिट वाढतात तसे रेट स्लॅबप्रमाणे देखिल दिडपट दुप्पट चौपट होतात.
३. तुमच्या कनेक्शनच्या रेंजच्या बाहेर खपत गेली कि पेनाल्टी लागते. ४ किवॅ चे कनेक्शन बदलून ६ किवॅचे करायला हवे, इ.
४. जास्त कंजप्शन मुळे एखादी सबसिडी, असल्यास, त्या महिन्यात मिळत नाही.
नि भयंकर बिल हातात येऊन पडते.

जनरली एकाच फ्लॅटचे बिल २०,००० प्रतिमाह (पाण्याची मोटर, १-२ एसी, फ्रिज, कूलर, आंघोळीचा हिटर, स्वयंपाकाची विद्युत साधने, आणि खूप सारे इलेक्ट्रीक सामान) आले तर ते (दिल्लीच्या दरांप्रमाणे) अबनॉर्मल नाही. म्हणजे वीजमंडळ कधी कधी विजेचा एक दिवा असणार्‍या शेतकर्‍याच्या झोपडीत ९ लाख -१० लाख रु चे एका महिन्याचे बिल पाठवते. ज्याला टोटल गाढवपणा (चूक) म्हणता येईल. अशा टोटल गाढवपणाच्या केसेस पटकन सुटतात. पण ही जी बिलो २०के बिले आहेत त्यांचे वाद सोडवणे झमेला असते. त्या मंडळाच्या डिफॉल्ट मते बॉर्डर केसेस आहेत, जे योग्य वाटते.

अजो,
आमची वीज बिल रक्कम साताठशे रुपयांच्या आसपासच असते कैक महिने. कूलर, एअर कण्डिशनर असे काहीही आमच्याकडे नाही.
साताठशे वरुन एकदम अकराहजार ही फार मोठी उडी आहे.
.
.
ह्या अधिकार्‍यांना इतर काही वेगळी अपेक्षा आहे का, तेही समजत नाही. केवळ खेटे मारावे लागत आहेत.

डेप्युटी इंजिनिअर साहेब दरवेळी त्या दुसर्‍या हापिसातून अमुक एक रिपोर्ट लिहून आणा असे सांगतात.
दुसर्‍या हापिसात जाउन जो रिपोर्ट आम्ही आणतो; त्यात अमुक एखादा तपशील नाही; असे सांगतात;
नव्याने पिटाळतात. आज अजून एक चक्कर मारतो आहे.
सध्या एम एस इ बी च्या लोकांचे असे ठरते आहे :-
आधीचा जळालेला मीटर काढून त्याजागी नवीन मीटर बसवून पंधरा वीस दिवस झाले आहेत.
ह्या दिवसातलं कन्झम्प्शन पहावे. रिडिंग मोजावी; त्या हिशेबाने बाकी गोष्टी ठरवाव्यात. (
नेमक्या काय ते मात्र मला ठाउक नाही )
.
.
त्यांची नव्या मीटरची रिडिंग आहे :-
दिवसाला नऊ युनिट्स !
महिन्याला दोनशे सत्तर युनिट्स !
म्हणजे यापुढे दर महिन्यात पंधराशे ते सतराशेच्या असपस बिल येइल असं वाटतं.
म्हणजे पूर्वी येत असे त्याच्या दुप्पट बिल येणार.
दूरचा विचार करता हे महागात पडलं बॉस.

नमस्कार,
आज एम एस इ बी मधल्या सायबानं तीन हजार आठसे वीस, इतकी रक्कम भरा म्हणून सांगितलं.
प्लीझ नोट :- ही रक्कम म्हणजे एकाच महिन्याचे बिल नव्हे.
हे प्रकरण सुरु झाले ते मागील सुमारे महिन्यात अकरा हजार बिल दाखवून जुने मीटर जळाले म्हणून. त्यादरम्यान नवीन मीटर बसवले; फॉलो अप घेत राहिलो; पाठपुरावा अक्रीत राहिलो. ह्यात एक महिना गेला. व ते अकरा हजार रुपये शिल्लक होतेच; अजून एक महिना गेल्याने अजून एक बिल आले.
थोडक्यात; तीन हजार आठशे वीस रुपये ही रक्कम दोन महिन्याची म्हणून भरायची आहे. ( सोळा दिवसाची नव्या मीटारची रिडिंग घेउन, त्यावरुन आमचा दरदिवसाचा वापर नऊ युनिट्स आहे असा निष्कर्ष काढून हा आकडा आलेला आहे. एका महिन्याचे ३८००/२ = १९००, एकोणीसशे रुपये इतकेच बिल आले आहे.)
.
.
"तीन हजार आठशे वीस रुपये सुद्धा जास्त आहेत; तुमच्या मोजमापात चूक आहे. ( तुम्ही सोळा दिवसांची रिडिंग एकशे चौदा युनिट्स असताना , एकशे चव्वेचाळिस युनिट्स मोजलेत. व त्यावरुन १४४/१६ = ९. दर दिवसाचा नऊ युनिट्स इतका हिशेब मांडलात; प्रत्यक्षात तो सातेक युनिट्सच येतो)" हे सांगायची तीव्र इच्छा होती. पण त्यानं प्रकरण अजूनच लांबलं असतं. कॉस्ट-बेनिफिट्सचा विचार करुन मी जे काय फायनल ठरतय ते भरुन
मोकळं व्हायचं ठरवलं.