चल पुन्हा तळ्याच्या काठी
जांभळ्या टेकडी तळिचे
ते तळे खुणावुन हसले
अन पहाटफुटणी मधल्या
केशरात अलगद लपले
थरथरली तीरावरची
गवताची पाती ओली
वाऱ्याची फुंकर येता
पाण्यावर झुंबर फुटले
घनदाट शांतता इथली
तोलून थिरकत्या पंखी
पाखरू एक इवलेसे
क्षण एक लकेरुन गेले
नि:शब्द, तरल जे सारे
ते इथेच जन्मा आले
कोवळे ऊन टिपताना
हलकेच धुके शिरशिरले
चल पुन्हा तळ्याच्या काठी
चल पुन्हा, पुन्हा चल जाऊ
अस्वस्थ जगाचे मागे
कोलाहल सोडुनी सगळे.
प्रतिक्रिया
मला वाटतं
हि कविता पहाटेच्या वेळेपेक्षा सायंकाळ बोलेतो कातरवेळी चांगली खुलली असती, सक्काळ सक्काळ कदरुन जाण्याएवढा कोलाहल नसतो म्हणून वाटलं.
चल पुन्हा तळ्याच्या काठी
चल पुन्हा, पुन्हा चल जाऊ
अस्वस्थ जगाचे मागे
कोलाहल सोडुनी सगळे
भांबड आलं
अशा एखाद्या तळ्याच्या काठी
या अनिलांच्या कवितेची आठवण झाली.
कविता आवडलीच.
*****************
मेरी मोटी है खाल, लेकीन नाजूक है दिल!!
हाकुना मटाटा!!
*****************
नाजुक चित्रदर्शी कविता. पण
नाजुक चित्रदर्शी कविता. पण अगेन, अनुभवाला जास्त अर्थ असतो.
----------------------------------------------------
बिटकॉइनजी बाळा नित्य ध्यातसे हृदयिं दाम माला
जरा विस्कटून सांगता?
अनुभव - कवीचा की वाचकाचा?
अनुभवाच्या अर्थाला कमी - जास्त ठरविणारी मोजपट्टी असते?
'इथे'
तुमच्या कवितेतल्या वातावरणाशी साधर्म्य असलेली 'इथे' नामक शांता शेळकेंची कविता आम्हांला चवथीला पाठ्यपुस्तकात होती, तिची आठवण झाली. आभार ! ती कविता मला फार आवडे; विशेषत: शेवटची काही कडवी. आठवणीतूनच इथे देत आहे.
आम्रतरू हा धरी शिरावर प्रेमळ निजसाउली
मृदुल कोवळी श्यामल हिरवळ पसरे पायांतळी
आणिक पुढती झरा खळाळत खडकांतुन चालला
साध्या भोळ्या गीतामध्ये अपुल्या नित रंगला
काठीं त्याच्या निळी लव्हाळी डुलती त्यांचे तुरे
तृणांकुरांवर इवलाली ही उडती फुलपाखरे
खडा पहारा करिती भवती निळेभुरे डोंगर
अगाध सुंदर भव्य शोभते माथ्यावर अंबर
दुर्मिळ ऐशी देई शांतता सदा मला हे स्थल
ऐकु न येई इथे जगाचा कर्कश कोलाहल
व्याप जगाचा विसराया मी येई इथे सत्वर
अर्ध्या मिटल्या नयनी बघते स्वप्ने अतिसुंदर
शांतविले मी तप्त जिवाला इथे कितीदा तरी
कितीदा यावे तरी येथली अवीट ही माधुरी !
अतिशय सुंदर तरल कविता
फार सुंदर तरल कविता !
आवडली.
कोवळे ऊन टिपताना
हलकेच धुके शिरशिरले
हे तर फारच सुंदर जमलय्
सुंदर कविता.
सुंदर कविता.
प्रतिसाद देणार्या
सर्वांना धन्यवाद!
आवडली
कविता आवडली.
कविता
अर्थातच आवडली. प्रतिसादात आलेल्या कविताही आवडल्या.