जंगलगोष्ट - ४

जंगल स्वतंत्र झाल्यापासून जंगलात जेव्हा माझं राज्य आलं तेव्हापासूनच विकास झाला, जंगलातील प्राण्यांची भरभराट झाली अशा डरकाळ्या फोडत सिंह देशोदेशीच्या दौऱ्यावर तर कधी जंगलात विकास कामांच्या उद्घाटनप्रसंगी लोकांची वाहवा मिळवत होता. पण काही केल्या सत्तेवर येतानाची लाट काही सिंहाला काही दिसत नव्हती. मग सिंहाने जंगलातील सगळ्या विभागांना आणि अधिकारी प्राण्यांना आदेश दिला पुढच्या शंभर दिवसांत सगळ्या विकासकामांसाठी कार्यक्रमांचे आयोजन करा. दरम्यान महत्वाच्या मुद्द्यांवर लक्ष न दिल्याने एक वर्ग चांगलाच नाराज झाला होता. अर्थात एका वर्गाच्या मागण्या दुसऱ्या वर्गांचे अधिकारासाखेच बहाल करा अशा होत्या. वेळ पडल्यास कायदे करा पण आमच्या समाजाला हक्काचे फायदे द्या असा एककलमी कार्यक्रम होता. असे कार्यक्रम जंगलात वेळोवेळी होत होते. पण यंदा त्यांचे उग्र स्वरूप झाले होते. एकूण सिंह चतुर होता त्याची राजकीय प्रगल्भता आणि ठराविक प्राणीमात्रांवरील पकड मजबूत होती. मागण्या करणारी वा नेतृत्व करणारी मंडळींना कसे गोत्यात आणायचे आणि त्यांचे उखळ जंगलातील प्राण्यांसमोर कसे पांढरे करायचे हे सिंह आणि त्याची भलामण करणारी मंडळी चांगलेच जाणून होते. जंगलात अनेक छोटी-मोठी जंगले होती त्यावर सत्ता मिळवून वर्चस्व स्थापित करणे एवढाच एककलमी कार्यक्रम जोरात चालू होता. त्यासाठी सिंहाचा पक्ष निवडून येणाऱ्या लोकांना(विरोधी पक्षात का असेना) स्वपक्षात घेउन पवित्र करून पॉलिटिकल ईमेज मेकओव्हर करण्यात पटाईत होता. जंगलातले भाबडे प्राणीमात्र मात्र कमी नालायक आणि जास्त नालायक या पर्यायातून कमी नालायक नेता निवडत होते. बुरसटलेल्या व्यवस्थेसमोर सकलजन प्राणी हतबल झाले होते.
(क्रमशः)

-------------------------
© भूषण वर्धेकर
-------------------------