जाग्रत, उत्तिष्ठ ...

अलिकडेच मी एका भयंकर पुस्तकाबद्दल ऐकलं. हे पुस्तक बऱ्याच लोकांना अभ्यासपूर्ण वाटतं. निदान तसं दाखवण्यात तरी लेखिका यशस्वी झाली असावी. पण या लोकांची माथी भडकवण्याचं काम हे पुस्तक करत आहे. या पुस्तकाचं नाव आहे 'सेकंड सेक्स'. आणि हे पुस्तक सिमॉन बुव्वा नावाच्या एका फ्रेंच बाईने लिहीलं आहे. स्वतःच्या नावाप्रमाणेच या पुस्तकात तिने पुरुष आणि धर्माविरोधात मोठा बागुलबुवा उभा केला आहे.

यात त्या बाईने पुरुषांवर, सगळ्या पुरुषांवर, फक्त तिला माहित असलेल्याच नाही, तुमच्या आमच्यावरही टीका केली आहे. या बाईने पुस्तकात पुरुषांचं गरीब, बिचारं आणि हास्यास्पद ठरवलेलं आहे. या बाईंच्या मते पुरुष इन्फिरिअॉरिटी कॉंप्लेक्सने पछाडलेले असतात म्हणून ते बायकांना दुय्यम दर्जा देतात. मग स्त्रियाच बांडगूळासारख्या त्यांच्या नवऱ्यावर अवलंबून असतात याचं काय? आम्ही सांगतो काय बायकांना शिकू नका, नोकरी करू नका म्हणून! गेली कितीतरी वर्ष आपल्याकडे मुलींना फुकटात शिकवत आहेत, आता तर इंजिनियरींगला आरक्षित जागाही ठेवलेल्या आहेत, तरीही काय दिवे लावलेत बायकांनी? किती कंपन्यांमधे बायका मान मोडून काम करताना दिसतात? अगदी कारकून बायकासुद्धा सतत चहा आणि चकाट्या पिटत असतात. अगदी जिममधे गेल्या तरी तिथेही गप्पा जास्त आणि व्यायाम कमी असतो यांचा. ते पण याच बाईने डोक्यात भरवलेलं खूळ असावं, की बायकांनी व्यायाम करावा.

दुसरं म्हणजे या पुस्तकात म्हणे खासगी मालमत्तेमुळे बायकांचं स्थान खालचं झालं असं लिहीलं आहे म्हणे. उलट पुरुषांचीच बायकांमुळे पिळवणूक होते. या काही कमावत नाहीत, तदुपरि लग्न करून देण्यासाठी हुंडा द्यायला लागतो, तो मुलाची आईसुद्धा मागते, पण मान अडकते ते मुलीच्या वडलांचीच. मुलीला किंवा मुलीच्या आईला हुंडा द्यायला लागत नाही. विदर्भातल्या शेतकऱ्यांच्या आत्महत्या पाहिल्या तरीही जीव कोणाचा जातो, पुरुषांचा. तदुपरि या बायका म्हणतात की आमच्यावर अन्याय झाला आहे. 'सेकंड सेक्स' हे पुस्तक म्हणजे भांडवलशाहीविरोधी, परंपराविरोधी, विषारी, डाव्या विचारांच्या प्रसारासाठी पांघरलेला स्त्रीवादाचा बुरखा असावा अशी शंका येते.

मी असंही ऐकलं आहे की या बाईंनी कादंबऱ्याही लिहील्या. त्यातल्या स्त्रिया आणि पुरुषांचं नातं एवढं काही पॉझिटीव्ह दाखवलेलं नाही. स्वतः लग्न केलं नाही, मुलं होऊ दिली नाहीत, एक गर्भपातही केला तर कुठून या बाईला माणसातला, नात्यांमधला चांगुलपणा दिसणारे? एवढंच करून ही बाई थांबली नाही, अज्जीच बायकांना मातृत्त्व नाकारण्याचाही आग्रह या बाईने लिखाणातून केला. स्वतः आई न बनलेल्या या बाईला आई-मुलाच्या नात्यातलं पावित्र्य कसं समजणार आहे? कधीतरी भारतात येऊन गेली असती तर हिला अज्जीच समजलं असतं की आई-मुलांचं नातं किती सोज्ज्वळ आणि थोर असतं ते!

मला कधीकधी संशय येतो की हे पुस्तक या बाईंनी लिहीलंच नसावं. घरंदाज बायका या सज्जन, देवी असतात. कुठे आपल्या सावित्रीबाई आणि कुठे ही सिमॉन. मला तर संशय आहे की बाईचं नाव घेऊन कोणी डाव्या विचाराच्या पुरुषानेच हे पुस्तक लिहीलेलं आहे. मला तिच्या बॉयफ्रेंड, जॉन सार्त्र याच्यावर संशय आहे. या जॉनला डाव्या विचारांमुळे अटकही झाली होती; पण तेव्हा प्रेसिडंटचा वशिला असल्यामुळे तो सुटला. पण त्याला नोबेल पुरस्कार मिळाला असल्यामुळे तो हुशार होता असं मानायला जागा आहे आणि गर्लफ्रेंडच्या नावाने त्यानेच पुस्तकं लिहीलेली असण्याची शक्यता नाकारता येत नाही.

भारतात जिथे सावित्रीबाईंसारखी सती जन्माला आली तिथे या सिमोन नावाच्या बागुलबुवामुळे स्लटी सावित्र्या जन्माला येत आहेत. आज पुरुषच नाडला जात आहे, व्यवस्था आणि बायकांकडून. त्यापैकी व्यवस्था पूर्ववत करायला आपल्याला वेळ लागेल. पण सगळ्यात पहिले आपण आपल्या शिस्नाची सत्ता परत आणण्यासाठी बायकांना आपल्या खासगी आयुष्यातून पूर्ण वेगळं केलं पाहिजे. तसंही बायकांना आपलं कर्तृत्त्व, आपली शारीरिक ताकद यांच्यामुळे आपला तिरस्कार असतोच. प्रख्यात लेखक अॉस्कर वाईल्ड आणि पहिला कंप्यूटर बनवणारा अॅलन ट्यूरींग या लोकांना त्यांनी त्यांच्या आयुष्यातून बायकांना दूर केल्यामुळे फार जाच सहन करावा लागला. पण आता जमाना आपलाच आहे. या आणि अशा अनेक अनाम वीरांना आपण आपलं आदर्श बनवून आपली जीवनपद्धती बदलण्याची वेळ आलेली आहे.

आता अज्जीच वेळ आलेली आहे की पुरुषांनी या असल्या बायकांना धडा शिकवलाच पाहिजे. या एकाच बाबतीत आपण अमेरिका आणि अमेरिकन बायकांचं अनुकरण केलं पाहिजे. जशा अमेरिकन बायका 'पुरुष नकोत', म्हणून लेस्बियन होतात. आता त्यांचं अस्त्र त्यांच्यावरच उलटवलं पाहिजे. बायकांना टाळून आपण सगळ्या पुरुषांनी एकत्र येऊन गे बनल्याशिवाय हा अत्याचार संपणार नाही. पीडीत पुरुषांनो, गे बना.