मिस कॉल
© मंगेश पंचाक्षरी, नासिक.
( रविवारी दि 13 ऑगस्ट 2017 रोजी दै सकाळ मध्ये पान क्र 6 वर छापून आलेला लेख)
आमच्या सौ ला कोणी 'मोबाईल'वर फोन केला तर मुळात आपला फोन वाजतो आहे हेच त्यांना लवकर समजत नाही. कारण त्या रोज मोबाईलची 'रिंग' बदलत रहातात. मोबाईल ही वस्तू रोज 'वॉलपेपर , रिंगर आणि डीपी' बदलणे एवढ्या साठीच असते अशी सौ ची ठाम समजूत आहे. सौ च्या प्रत्येक पर्सला खूप सारे 'कप्पे' असतात. त्यातल्या कोणत्या तरी 'कप्प्यात' सौ मोबाईल ठेवतात. मोबाईल ठेवण्याचा 'कप्पा' कधीही फिक्स नसतो. त्यामुळं मोबाईल ची 'रिंग' वाजायला लागली की सौ पर्स मधून मोबाईल सोडून इतर सर्व सामान बाहेर काढून मोबाईलचा शोध घेऊ लागतात. एका पर्स मध्ये इतकं समान मावू शकते यावर सौ सह आमचाही विश्वास बसत नसतो. त्यात बऱ्याच वेळा पूर्वी घरभर शोधलेल्या वस्तूचा अचानक 'लाभ' होतो. सौ त्यात 'हरवून' जातात. इकडे मोबाईल ची 'रिंग' वाजतच रहाते. अखेर मोबाईलचं वाजणं आणि थरथरणं बंद होते. आता एवीतेवी रिंग बंद झालीच आहे तर मोबाईल 'शोधून' काय उपयोग असा विचार करून सौ मोबाईल बाहेर न काढताच पुनः सर्व सामान पर्समध्ये भरून ठेवतात. पर्सची चेन बंद केली जाताच पुनः मोबाईल वाजणे सुरू होतं. विशेष म्हणजे 'मोबाईल'चा शोध परत पहिल्या प्रमाणेच सुरू होतो.
बायकांनी लवकर मोबाईल न उचलण्याचे 'मूळ' हे त्यांच्या पारंपरिक पोशाखात आहे. बायका जनरली साडी किंवा पंजाबी ड्रेस या वेशात असतात. या पोशाखाना खिसा नसल्याने मोबाईल पर्स मध्ये ठेवण्याशिवाय त्यांना पर्याय नसतो. क्वचित काही स्त्रिया जीन्स वापरत असल्या तरी पुरुषांप्रमाणे जीन्स च्या खिशात मोबाईल ठेवण्याची बायकांना सवय नसते. घरात किचन मध्ये पोळ्या वगैरे करताना, घरकाम करताना त्यांना पटकन मोबाईल वापरता येत नाही. आजकाल घराघरांत बरीचशी भांडणे ही केवळ बायको ने वेळेवर मोबाईल 'न' उचलण्याच्या कारणाने होत असतात.
बायकांची मात्र नवऱ्याकडून चटकन 'मोबाईल' उचलण्याची अपेक्षा असते. नवऱ्याने मोबाईल उचलायला उशीर केला की बायको ला नको नको त्या 'शंका' यायला लागतात. नवरेही काही कमी नसतात. त्यांच्या मोबाईल मध्ये सर्वात जास्त 'मिस' कॉल हे 'मिसेस' चेच कॉल असतात. एरवी एखाद्या 'मिस' चा कॉल कोणी पुरुष कशाला 'मिस' करेल?
© मंगेश पंचाक्षरी, नासिक.
इमेल:- mangeshp11@gmail.com
ललित लेखनाचा प्रकार
पंजाबी ड्रेस ना आजकाल खिसे
पंजाबी ड्रेस ना आजकाल खिसे असतात...ॲण्ड व्हॉट रबिश पारंपारीक पोशाख़ वगैरे...
मी सणावाराला पंजाबी घालते. साड्या, कुणा जवळच्या नातेवाईकांच लग्न असेल तर. अदरवाईज जीन्स रॉक्स... आजीच्या जमान्यातल्या गोष्टी सांगून जनमानसात चूकीची प्रतिमा तयार करण्याचा दुष्ट प्रयत्न आहे हा...
मालकीणबैंच्या कुर्त्याला खिसे
मालकीणबैंच्या कुर्त्याला खिसे असतात असे त्यांनी जेंव्हा ह्या विषयावर ऐसीवर गहन चर्चा झाली होती तेंव्हा सांगितले होतेच.
-------------
आजीच्या जमान्यातल्या गोष्टी सांगून जनमानसात चूकीची प्रतिमा तयार करण्याचा दुष्ट प्रयत्न आहे हा...
ह्याच प्रतिमेला मी किळसवाणे चित्र म्हणले होते पण अजोंना त्याचा राग आला :-(
सोय म्हणून.
काही शब्द अवतरण चिन्हात का लिहिले आहेत हे काही आकळले नाही अजून
कोठे आणि कशावर (किंवा कशाला) हसावे, हे समजण्याची सोय व्हावी, म्हणून असावे बहुधा.
म्हणजे कसे आहे ना, की लहानपणी शाळेत वर्गात सदैव अगम्य किंवा रटाळ विनोदकथनाची सवय असलेल्या मुलास आम्ही सांगत असू, की बाबा रे, विनोद सांगून झाला, की मेहेरबानी करून हात वर करत जा, म्हणजे आम्हांस हसायचे कधी, ते कळेल, म्हणून. पण 'ऐसी'सारख्या माध्यमात हात वर करायची सोय नसते, म्हणून ही पर्यायी सोय असावी बहुधा.
किंवा, अमेरिकन (आणि कदाचित ब्रिटिशसुद्धा? चूभूद्याघ्या.) टीव्हीवरील विनोदी सीर्यलींत नाही का, अधूनमधून मोक्याच्या ठिकाणी 'कॅन्ड लाफ्टर' नावाचा प्रकार पेरून ठेवलेला असतो, तशातला काही प्रकार असावा.
(बादवे, प्रस्तुत शब्द अवतरणांत टाकण्याऐवजी जर अधोरेखित केले आणि/किंवा बोल्डटैपात टाकले, तर अधिक बरे दिसतील काय? कोठूनतरी लक्ष वेधल्याशी मतलब.)
बायकांनी लवकर मोबाईल न
आमचे एक मित्र नेमका हाच गहन प्रश्न घेऊन गेली अनेक वर्षे संशोधन करीत आहेत. इथे ऐसीवर सुद्धा त्यांनी फोकस ग्रूप केला आहे.