..विचारेन त्यालाच कॉफी चहा..

कानडाऊ योगेशु

..विचारेन त्यालाच कॉफी चहा..

भरोसा करावा कुणाचा जरी..
भरोसाच नाही कशाचा जरी..!

विचारेन त्यालाच कॉफी चहा
घरी दूत आला यमाचा जरी

मिळो गार माझी तुला सावली
किती त्रास मजला उन्हाचा जरी

मनी मान्य केले शशीचोर मी!
खुळा आळ आहे नभाचा जरी.

म्हणे वाघ गेल्याच जन्मातला
अता जन्म आहे सशाचा जरी

किती त्यात जो तो पुरा गुंतला
खरा खेळ होता मनाचा जरी

अरे वाकला तो कशाने असा.?
तसा भार नव्हता जगाचा जरी!

खरा भक्त त्याला मिळो एकदा
तिथे प्रश्न असला युगाचा जरी!

- कानडाऊ योगेशु

कानडाऊ योगेशु Sat, 14/05/2016 - 11:15

पटाईतकाका,
हा अर्थ लक्षात आला नाही.
विचारेन त्याला कॉफि चहा ह्याचा मी मांडलेला अर्थ अरे चहा कॉफि घेणार का? असा आहे.
तुम्हाला जाणवलेला अरे तू चहा कॉफि घेऊन आलाच असशील असा आहे. ;)

'न'वी बाजू Sat, 14/05/2016 - 17:44

यम (वा त्याचा दूत यानी कि पर्सनल रेप्रेझेंटेटिव) जर घरी आला, तर फक्त त्यालाच कॉफी-चहा विचारणे बरोबर आहे काय? त्याच्याबरोबर आलेल्या त्याच्या रेड्याचा काही विचार? तो तर बिचारा इतकी तंगडतोड करतो, वर मेलेल्यांची ओझी (= dead weight)... त्याची थोडीसुद्धा विचारपूस नको? अरे, काही माणूसकी आहे की नाही? निदान त्याला हवे-नको ते विचारून, फुटक्या/कान तुटलेल्या कपातून का होईना, पण अर्धा कप चहा तरी द्यायचा. (रेड्याला कॉफी म्हणजे टू मच होते हे एक वेळ मानून चालू. पण चहासुद्धा नाही? काय दार्जीलिंग द्यायला नाही सांगत आहे; पण गेला बाजार 'वाघ बकरी' तरी द्याल की नाही?) पण नाही!

- ('च'ची भाषा चांगलीच समजणारा) 'न'वी बाजू.

.शुचि. Sat, 14/05/2016 - 19:31

=)) नबा आता यम खूष आणि रेडा तर डबल खूष बर्का तुमच्यावरती. आता एक वोह द्वापार के त्रेता जुग का अश्वत्थामा और कलिजुग मे एक आप!! आता घाबरायचं कारणच नाय.

कानडाऊ योगेशु Sat, 14/05/2016 - 19:41

ख्या ख्या ख्या!

एखाद्याचा जीव जातो आणि ते म्हणतात कि साधा चहा सुध्दा विचारला नाही.!

वेल इन दॅट केस तो शेर असा होऊ शकतो

विचारेन त्यांनाहि कॉफि चहा
घरी दूत आला यमाचा जरी!

यम खूस रेडा भी खूस!