मीच वागवतो मला सावत्र भावासारखा - गझल

लांब आलो कितीतरी आता
जाउया आपल्या घरी आता

=====================

कोण आहे याइथे माझ्या स्वभावासारखा
सोसतो आनंद मी आता तणावासारखा

तू कशाला काढतो आहेस खोड्या जीवना
मीच वागवतो मला सावत्र भावासारखा

====================

घेत गेलो सारखा उपभोग आयुष्या तुझा
पण तरी जडलाच नाही रोग आयुष्या तुझा

====================

तुझे निश्चीत नाही हे तरी निश्चीत आहे ना
मला माहीत आहे हे तुला माहीत आहे ना

===================

एकटे प्यायला मजा येते
आपले व्हायला मजा येते

ती मला भेटण्याहुनी हल्ली
वाट पाहायला मजा येते

ध्येय नसण्यास ध्येय केले की
ध्येय साधायला मजा येते

नाहिलेल्या अनोळखींचेही
केस हुंगायला मजा येते

ती विषय काढणार नाही तो
ज्यात बोलायला मजा येते

मी तिथे जीव लावतो जेथे
जीव सोडायला मजा येते

होउनी 'बेफिकीर' एखादे
नाव विसरायला मजा येते

=================

-'बेफिकीर'!