ओंजळ

तुझ्या माझ्या सोबतीचे
क्षण अजून संपले नाही
ओंजळीत तुझ्या स्वप्ने
अजून माझी उरलीत काही

आठव ते क्षण कसे
सोबत असताना उडून जायचे
निरोप घेतल्यावर सुद्धा
काही बोलणे राहून जायचे
ओठांमध्ये तेच शब्द,
माझ्यासाठीचे उरलेत काही..१

हातात गुंफून हात त्या,
सांजा हलकेच निघून गेल्या
जाता जाता गहिऱ्या,
आठवणी मागे ठेवून गेल्या
भूतकाळातल्या असल्या तरी,
आठवणी अपूर्ण राहिल्यात काही...२

आयुष्यातून गेली नाहीस,
डोळ्यात अजून आहेस उरलेली
निरोप घेतला असलास तरी,
भेट अजून नाही सरलेली
डोळ्यात तुझ्या माझ्या वाट्याचे
अश्रू अजून उरलेत काही... ३