आभाळाच्या फळ्यावर
धूमकेतूच्या खडूने
आभाळाच्या फळ्यावर
काहीबाही लिहीण्याची
होता ऊर्मी अनावर
चांदण्यांच्या ठिणग्यांची
घेतो मदत जराशी
चित्रलिपी सजविण्या
लिहीतो मी जी आकाशी
रात्र होते जशी दाट
तशा काही अनवट
मिथ्यकथा नक्षत्रांच्या
उजळती माझी वाट
झळाळते तेजोमेघ
गूढ कृष्णविवरांशी
बोलताना, जोडतो मी
नाळ आकाशगंगेशी
भेट विराटाशी थेट
माझ्या नक्षत्रभाषेची
रोमरोमातून तिच्या
रुणझुण ये सूक्ष्माची
लागे उगवतीपाशी
जेव्हा उषेची चाहूल
माझ्या नक्षत्रभाषेची
फिकटते चंद्रभूल
प्रतिक्रिया
खाण्याचं
खाण्याचं काय करता ? की सूर्याच्या तव्यावर भाजता पोळी ?
आम्ही काय
कुणाचे खातो ।....
Btw चांदणचुरा खातो अन् आकाशगंगाजल पितो
...
शाकाहारी काय?
(आकाशगंगाजलाची मद्यार्कशेकडेवारी किती?)
...
ब्रह्माण्ड-शाकभक्षी (brahmovo-vegetarian)
(टक्केवारीबाबत अनभिज्ञ. पण भूलोक व स्वर्लोक यांच्यामधील सीमारेषेवर अनंतकाळ तरंगत ठेवण्याइतपत पावरफुल असल्याचा अनुभव)
सुंदर
सुंदर
विद्या द्यावी