संवत्सर
अजित विश्वनाथ भागवत
चैत्रात पालवे
सुजाण हळवी
मोहोर आरास
सौभाग्य मिरवी
देखणा उंबरा
तोरण दारास
ग्रीष्मात दूरस्थ
घामेजले काही
दीर्घ उच्छ्वास
संपन्न चुलीला
हुरहूर थोडी
गारव्याचा ध्यास
वीज उन्मादली
सरींचा कोसळ
आषाढात मग्न
मोरपीस गाते
श्रावणाची धून
हिरवी कृतज्ञ
शारद-चांदणे
दैवी संकेतांचे
सौहार्द-स्निग्ध
चेतली आकांक्षा
कापराच्या देही
अर्पण-सिद्ध
अनाकलनीय
शिशिराचे दान
शब्द मौनाचे
सखी प्रज्ञावती
निष्पर्ण खोडाची
कुंडली वाचे
0 >>>
कविता आवडली
संपूर्ण वर्षाच्या वेगवेगळ्या ऋतूंना मोजक्या प्रतिमांनी सजवणारी कविता आवडली. संपन्न चुलीला गारव्याचा ध्यास, आणि कापराच्या देहात चेतणारी अर्पणाची आकांक्षा या प्रतिमा विशेष मोहक आहेत.
बहुतांश ओळींत असलेली सहा अक्षरांची लय काही ठिकाणी पाच अक्षरांनी तुटते मात्र.