ओतप्रोत

अजून दारी पारिजात आरक्तफुलांनी कसा डवरतो
पहाटवारा मूक स्पर्शता सडा शिंपुनी का गहिवरतो?

अभिसाराच्या अधीर गात्री अभिचारी का हिरवे गोंदण
धगधगत्या का इंगळांवरी थरथरते पांढुरके लिंपण?

नतभावाचे गाणे झरता रतरात्रींचे आठव अलगुज
जाता जंगलवाटांवरुनी पंचम नादे मनात अविचल

गणगोतांच्या उदार मेळीं स्वर माझा जरि करितो गुंजन
निर्झर मायेचा ओलांडुन आत वाजतो अलख निरंजन

डंख मधाचे नाजुक झेलत, उधळत ऋतुहृदयीची तळमळ
ओंजळीतल्या कळ्या उमलता गाभाऱ्याच्या भाळी परिमळ

सरत्या रात्री शिशिरऋतूच्या दंव कर्दळिचे टिपूर स्मरते
भरल्या पात्री ओतप्रोत या जळ निर्मळ हे अजूनी पडते