Skip to main content

दिवस माझे हे फुगायचे .. (विडंबन)

'
(चाल- दिवस तुझे हे फुलायचे )

दिवस माझे हे फुगायचे
तिकिटावाचून रुसायचे ...

तुरुंगात आनंदी राहणे
तिथेच भेटती पाहुणे
पाहुण्यात रंगत रहायचे ..

पाजावी देशीची बाटली
करावी गळ्याशी ओली
नेत्याचे स्वप्न ते पहायचे ..

थरार मिळाले जर
आनंदे तिकिटाचा भार
इतरांनी द्वेषच करायचे ..

माझ्या या तुरुंगापाशी
थांबली गाडी दाराशी
पक्षात स्वागत व्हावयाचे ..
.

राजेश घासकडवी Sun, 29/09/2013 - 03:20

फुगायचे दिवस म्हटल्यावर वेगळंच चित्र डोळ्यासमोर आलं.

दिवस माझे हे फुगायचे, चालता चालता झुलायचे

साखर तूप नि लोणी, चढवी मेदाच्या गोणी
अंगाला बाळसे धरायचे

मोजावा पोटाचा घेर, पुरेना पट्ट्याचा फेर
पॅंटीत दोंद हे भरायचे

थरारे जमीन दार, जिन्याला सोसेना भार
पायाने धरणी कंपायचे

माझिया घराच्या पाशी, थांबवा गड्यांनो टॅक्शी
चौघांनी मिळून भरायचे

तिरशिंगराव Sun, 29/09/2013 - 10:48

In reply to by राजेश घासकडवी

राजेशजी,
विडंबनाचे विडंबन फारच आवडले. मूळ शीर्षक वाचल्यावर जाडेपणासंबंधी असेल असेच, मलाही वाटले होते. ती अपेक्षा तुम्ही पुरी केलीत.