वीणा+प्र

सूत्रधार - तर मित्रहो यथासांग वीणा 'प्र' चा हात धरुन पळून गेली. दोघे चतुर्भुज झाली. दोघांचे आईवडील नमले. न नमून जातात कुठे? अन निसर्गचक्रानुसार वीणा गर्भवती राहीली. आज तिला ही बातमी 'प्र' ला कधी सांगते असे झाले आहे. पण तो तर रात्री हातभट्टीची ढोसून घोरतो आहे तर आता पुढे...
.

वीणा - 'प्र' राजा प्रभात-समयो पातला, बघ ना रे अष्ट्दिशा उजळवत तो सहस्त्ररश्मी कसा अरुणाच्या वेगवान रथावर आरुढ होऊन, घोडदौड करत येतो आहे. माझ्या राजहंसा तूच का असा नीजलेला? ऊठ नं प्रिया.मी अशी आतुर अन तू असा अवेळी नीजलेला.
.
(आळोखे-पिळोखे देत)प्र - च्यायची काय कटकट आहे. कोणी सुखाने झोपूही देत नाही. काय पाहीजे?
.
वीणा - प्र....प्र आज मी फार प्रसन्न आहे रे. असं वाटतय की कोणत्यातरी पुण्यधवल पूर्वसंचिताचे फळच माझ्या ओटी पडले आहे. मला तुला काही सांगायचे आहे रे
.
प्र - तू पण चढवली का सक्काळी सक्काळी बे. नीट बोल काय ते.
.
वीणा - प्र, अरे प्र काही दिवसातच आपल्या या इवल्याशा घरात चुटुचुटु लहान पावलं, दुडूदुडू धावणार आहेत. चिमुकली मृदू पावलं.
.
प्र - (ताडकन उठून बसत) क्काय उंदीर झालेत घरात? च्यायला पालींनी उच्छाद मांडला होताच, उंदीरही धुडगूस घालू लागले काय? आणतो डार्लिंग, आजच पिंजरा आणून हवा टाईट करतो एकेकाची.
.
वीणा - (लाजत) उंदीर नव्हे रे नवा पाहुणा घरी येतोय.
.
प्र - च्यायला, मग तसं सांग ना. नवीन पाहुणा म्हणजे तुझी म्हातारीच. गेल्याच महीन्यात आठवडाभर पुख्खा झोडून गेल्ती. परत कशाला येतेय म्हातारी, डोक्याला शॉट द्यायला? गेमच करतो तिचा यावेळी.
.
वीणा - माझ्या आईबद्दल असं बोलू नकोस हं. कसं सांगू रे प्र,

मी कशी शब्दात सांगू भावना माझ्या तुला,
तू तुझ्या समजून घे रे लाजणार्‍या या फुला.
अंतरीचा गंध माझा आज तू पवना वहा

प्र, राजा तुझं बीज अंकुरतय रे माझ्या उदरी. सलज्ज मान खाली घालून बसते>
.
प्र - अरं तेजायला मग सांग ना "मै तेरे बच्चेकी मॉ बननेवाली हूं". अर्रे मेरी जान, बस्स इत्तीसी बात और ये पतंगड!!! मोगॅम्बो खूष हुआ! ये मीठीत ये.
.
(..............इथे पडदा पडतो...........)
.
सूत्रधार - पाहीलत रसिकहो,ओबडधोबड दिसणार्‍या प्र च्या हृदयातही कुठेतरी अनाम हळवा कोपरा आहे. अन वीणा तो कोपरा बरोब्बर जाणते. तेव्हा या वरवर तरी 'विजोड' वाटणार्‍या पण अंदरही अंदर 'एकरुप' असणार्‍या जोडप्याला आपण शुभ चिंतू यात अन आता निरोप घेऊ यात.