"देह्तराणे"
अमेय६३७७
वस्त्रांमधल्या विन्यासाचा रंगबिरंगी होऊन धागा
तुजदेहाच्या भासाभवती चतुराईने लिंपून घ्यावे
केसांवरल्या जलबिंदूसम तीळ खुणेशी थांबून खाली
आवेगाने कोसळताना तुजप्राणांशी खोल भिडावे
स्पर्शामधल्या स्फुल्लिंगांनी तेजवताना श्वाससमाधी
कायेचे कायेशी बंधन वादळातले काहूर व्हावे
दान नव्हे जे दिले घेतले अथवा देवापुढे ठेवले
समरसतेच्या आलापांनी प्रेमतराणे निखरून यावे
शांतवणारी बेचैनी ही अर्ध्या मिटल्या डोळ्यांमधली
क्षणाक्षणाने विस्कटताना कणाकणाने उजळून जावे
गेय आणि लयबद्ध
वेगळ्या कल्पनांची गेय आणि लयबद्ध मांडणी छान आहे.
'शांतवणारी बेचैनी' समजू शकली नाही.