"काय घेणार?

"इडली. तू?"

"मला भूक लागलीये. खडा पावभाजी घेतो."

"मला सांग भेंजो, बंड्यामामा भाजी कशी आणतात हाॅटेलसाठी?"

"म्हणजे?"

"अरे म्हणजे एरवी नाही. पण हल्ली मार्केटमधे भाजीवाल्यांना बसू देत नाहीयेत ना? पोलिसांचं का म्युन्सिपाल्टीचं कायतरी मॅटर झालं म्हणून?"

"ओह ओके. मामा थेट मंडईतनं टेंपो मागवतात. भाज्या फ्रीझरमधे टाकल्या की चार दिवस पुरतात."

"कळलं. पण मग जास्त भाज्या मागवून लोकांना का विकत नाहीत? पब्लिकलाही भाज्या मिळतील, आणि बंड्यामामांचाही प्राॅफिट वाढेल. वाटल्यास चारऐवजी दर दोन दिवसात टेंपो आणायचा."

"मॅडम, मधे बसलात तर वारा लागणार नाही. साईडला बसा."

"बरं, थॅंक्स."

(थोड्या वेळाने)
"रिक्षा जरा फास्ट चालवाल का दादा?"

"नाही हो; इतर रिक्षांपेक्षा आपली रिक्षा हळू जाते."

"काय हो? इंजिनात काही बिघाड?"

"नाही नाही. वजन जास्त आहे. म्हणजे, बलास्ट लावलेत, त्यामुळे."

"बलास्ट?"

"हो. जहाजात गुरूत्वमध्य फार उंचावर असला तर जहाज कलू शकतं, बुडू शकतं. तसं होऊ नये म्हणून जहाजाच्या खालच्या भागात पाणी भरतात. तसंच, जहाजाच्या होल्डच्या एका भागात कार्गो भरतात तेव्हा वजनाचा समतोल रहावा म्हणून दुसर्‍या भागातल्या बलास्ट टँकमध्ये पाणी भरतात."

"फाउंटनला कोणती बस जाते?"

"बावीस नंबर. म्हणजे बसवर बावीस ही संख्या लिहिली असेल ती. आतापासून येणारी बावीसावी बस नव्हे. हु हु हु"

"हा हा हा. उत्तम विनोद होता."

"धन्यवाद. पण बसवर हुतात्मा चौक लिहिलं असेल - आता फ्लोरा फाउंटन म्हणत नाहीत त्या जागेला."

"अहो पण मी तिथे जातच नाहीये."

"तुम्हीच विचारलंत ना - फाउंटनला कोणती बस जाते?"

"हो, पण फ्लोरा फाउंटन नाही."

"मग?"

"फाॅना फाउंटन!"

"म्हणजे?"

"फ्लोरा म्हणजे वनस्पतीजगत. फाॅना म्हणजे प्राणीजगत. फाॅना फाउंटनजवळ विविध प्रजातींचे प्राणी आढळतात, म्हणून फाॅना फाउंटन."

"खरंच?"

"काय भेंजो, काल होतास कुठे? फोनपण उचलत नव्हतास!"

"अरे शूटला गेलो होतो."

"म्हणजे जिम कॉर्बेटसारखं? कसली शिकार केलीस? नरभक्षक बिबळ्याची?"

"गप भेंजो. वेब सिरीजच्या शूटला. निकिताला कंपनी द्यायला म्हणून."

"निकिता वेब सिरीजमधे काम करतेय? म्हणजे, ती फोटोजेनिक वगैरे आहे, पण शाळेत गॅदरिंगच्या नाटकातही कधी नसायची."

"निकिता नाही रे. पॅराबोला काम करतोय."

"म्हणजे निकिताचा डाॅगी? त्याला ॲक्टींग येते?"

"ल्हासा ॲप्सो हवा होता त्यांना. ज्यां पाॅलनी मला फोन केला होता. मग पॅराबोला घरचाच आहे. म्हणजे, घरचाच होईल ना.."