एक मर्दानी, आक्रमक मेक्सिकन
गवत कापण्याच्या गाडीवर बसून गाडी
रिंग रिंग रिंग सर्वत्र फिरवीत असतो.
भिरभिरणारी सहा फुटी पाती बेडकांच्या , उंदरांच्या
पोटातून सफाईदारपणे जातात ,
व्हॅक्यूम होताना गवतावर
रक्ताचे थेम्ब उमटलेले दिसतात .
कॉर्पोरेट मैदानावर फिरताना कापलेल्या गवताचा
ताजा वास दरवळत रहातो.
अमेरिका रेखीव बनते .
मग सुंदर स्त्रिया येतात
नाजूक बोटांच्या चिमटीत
स्कर्ट उचलून
हिरवळीवर तरंगत फिरतात .
त्यांच्या ओठावरची लिपस्टिक
त्यांचे मॅचिंग लालचुटुक बूट
त्यांचे किणकिणणारे हास्य
नजर ठरत नाही.
---

अस्थिर स्वप्नांच्या
नंतर होणाऱ्या सकाळी
घेऊन जायला येतात पावलांचे ठसे
त्यातून उगवते रात्र
जी होत गेेली पावलापावलागणिक
स्वरांचे असते नियंत्रण
वाहून गेलेल्या नदीवर
घरात फुटतात वाटा
आलेल्यांसाठी
दिव्यांचा उजेड सावल्यातही पडत नाही
अशी सकाळ येते पायऱ्या चढून
हळू हळू हळू हळू
रस्त्यांवरल्या अंधाराला ऊन म्हणून हाक देतो आपण
झाडांवरल्या पानांचा रंग विसरतो वारा
वाहतो शहराच्या पुलांवरून
पुलाला पालवी फुटत नाही
खिडक्या घेतात गिरक्या
कवडसे भिंतींना राखता येत नाही
माणसांचा गलका
जातो दूर डोळ्यापासून
पसरतो आवईसारखा चौकांच्या कानात
पाय ग्रासतात जमिनीने
पावसाच्या पाण्यात नसतात थेंब